এ কে কনষ্ট্ৰাকচন কোম্পানীৰ ঠিকাদাৰ পাৰিজাত শইকীয়াক ২ দিনৰ আৰক্ষী জিম্মালৈ প্ৰেৰণ

এ কে কনষ্ট্ৰাকচন কোম্পানীৰ ঠিকাদাৰ পাৰিজাত শইকীয়াক গ্ৰেপ্তাৰ কৰাৰ এদিন পিছত অৰ্থাৎ শনিবাৰে মুখ্য ন্যায়িক দণ্ডাধীশৰ আদালতত হাজিৰ কৰোৱা হয়। আদালতে তেওঁক দুদিনৰ বাবে আৰক্ষীৰ জিম্মাত প্ৰেৰণ কৰে।

শুকুৰবাৰে নিশা শইকীয়াক বিশ্বনাথ জিলাৰ চতিয়াৰ পৰা গ্ৰেপ্তাৰ কৰি দেওবাৰে পুৱা দিছপুৰ থানালৈ লৈ যোৱা হয়।

শইকীয়াক গ্ৰেপ্তাৰ কৰাৰ কেইঘণ্টামান পূৰ্বে নিৰ্মাণ কোম্পানীটোৰ সঞ্চালকক গ্ৰেপ্তাৰ কৰে গুৱাহাটী আৰক্ষীয়ে। বি বালাজী নামৰ আটকাধীন লোকজনক মহানগৰীৰ নাৰেংগী অঞ্চলত থকা নিজৰ কাৰ্যালয়ৰ পৰা আটক কৰে। পিছত তেওঁক আদালতত হাজিৰ কৰা হয়।

এ কে কনষ্ট্ৰাকচন কোম্পানীৰ মালিক এম ভেংকটেশ্বৰ ৰাও। গুৱাহাটীৰ ব’ৰৱেল ঠিকাদাৰৰ অধীনত তালিকাভুক্ত আৰু মহানগৰীৰ ১২টা স্থানত পানী যোগান প্ৰকল্পৰ ঠিকা লাভ কৰিছিল এই কোম্পানীটোৱে।।

বৃহস্পতিবাৰে গুৱাহাটীৰ গণেশগুৰি অঞ্চলত সংঘটিত এক মৰ্মান্তিক দুৰ্ঘটনাত এজন ছাত্ৰীৰ প্ৰাণ কাঢ়ি নিয়াৰ পিছতে গুৱাহাটী মহানগৰ খোৱাপানী আৰু নলা ব’ৰ্ডে কৰ্তব্যৰ প্ৰতি অৱহেলাৰ বাবে এ কে কনষ্ট্ৰাকচন কোম্পানীৰ বিৰুদ্ধে এফআইআৰ দাখিল কৰে। উল্লেখ্য যে কোম্পানীটোৱে খন্দা গাঁতৰ বাবে বৃহস্পতিবাৰে উক্ত দুৰ্ঘটনাটো সংঘটিত হৈছিল।

অভিযোগ উত্থাপন হৈছে যে নিৰ্মাণ কোম্পানীযটোৱে কাম সম্পূৰ্ণ হোৱাৰ পিছত গাঁতবোৰ পুতি পেলোৱা নাছিল আৰু প্ৰয়োজনীয় অঞ্চলত মেনহ’ল ঢাকিবলৈ স্লেব স্থাপন কৰা নাছিল।

উল্লেখ্য যে গুৱাহাটীত পাইপলাইন স্থাপনৰ বাবে JICA পানী যোগান প্ৰকল্পৰ অধীনত কাম কৰাৰ ঠিকা দিয়া ঠিকাদাৰৰ ভিতৰত এ কে কনষ্ট্ৰাকচন কোম্পানী অন্যতম।