এটা পুখুৰীত ৰহস্যজনক অৱস্থাত আই আৰ বি এন জোৱানৰ মৃতদেহ উদ্ধাৰ

অৰুণাচল প্ৰদেশৰ চাংলাং জিলাৰ দায়ুনস্থিত তৃতীয় আই আৰ বি এনৰ মুখ্য কাৰ্যালয়ৰ চৌহদত থকা এটা পুখুৰীত ৰহস্যজনক অৱস্থাত এজন আই আৰ বি এন জোৱানৰ মৃতদেহ উদ্ধাৰ হোৱা ঘটনাই সমগ্ৰ দায়ুন অঞ্চলটোতে তীব্ৰ চাঞ্চল্যৰ সৃষ্টি কৰিছে।

জানিব পৰা মতে আই আৰ বি এনৰ তৃতীয় মুখ্য কাৰ্যালয়ত কৰ্মৰত অৱস্থাত থকা চাংগে খাণ্ডু চিনচা জি (৩২) নামৰ জোৱান জন শনিবাৰে নিশা হঠাৎ সন্ধানহীন হৈ পৰে। শেষত জোৱান জনৰ মৃতদেহ আই আৰ বি এনৰ মুখ্য কাৰ্যালয়ৰ ভিতৰত থকা এটা গভীৰ দ পুখুৰীৰ পানীত ওপঙি থকা অৱস্থাত দেওবাৰে উদ্ধাৰ হয়।

নিজ কাৰ্যালয়ৰ চৌহদতে থকা পুখুৰীত কি কাৰণত কেনেকৈ কৰ্মৰত জোৱান জনৰ মৃত্যু হ’ব তাক লৈ এতিয়া ৰহস্যৰ সৃষ্টি হৈছে।

উল্লেখ্য যে মৃতদেহত কেইবাটাও আঘাতৰ চিন স্পষ্ট ৰূপত থকা পৰিলক্ষিত হৈছে। সেয়ে কোনো লোকে জোৱানজনক নিশা হত্যা কৰি পুখুৰীটোত পেলাই দিয়া বুলি সন্দেহ প্ৰকাশ কৰিছে দায়ুন আৰক্ষীয়ে।

ঘটনাস্থলীত চাংলাং লোহিত আৰু নামছাই জিলাৰ আৰক্ষী অধীক্ষক উপস্থিত হোৱাৰ লগতে অৰুণাচল প্ৰদেশৰ বৰডুমচা-দায়ুন সমষ্টিৰ বিধায়ক চামলুং মোছাং উপস্থিত হৈ ঘটনাৰ উচ্চস্তৰীয় তদন্তৰ ঘোষণা কৰিছে।

ইতিমধ্যে ইহসংসাৰত জোৱানজনে এৰি থৈ যোৱা পত্নী সহ দুটি সন্তানৰ পৰিয়ালটোক বিধায়ক চামলুং মোছাঙে পঞ্চাশ হাজাৰ টকাৰ এক কালীন সাহায্য আগবঢ়াইছে।

মৃত জোৱান জনৰ ঘৰ অৰুণাচল প্ৰদেশৰ বমডিলাৰ ৰূপা গাঁ‌ৱত বুলি জানিব পৰা গৈছে। ঘটনাটো কেম্পৰ ভিতৰত হোৱাৰ বাবে সোমবাৰেহে সমগ্ৰ ঘটনা পোহৰলৈ আহে।