নিখোজ হোৱাৰ ৪দিনৰ পিছত নৈত উদ্ধাৰ যুৱকৰ মৃতদেহ ; ওদালগুৰিত চাঞ্চল্য

দৰং জিলাৰ ৰঙামাটি নৈৰ পাৰত আজি এজন যুৱকৰ মৃতদেহ উদ্ধাৰ হোৱাক কেন্দ্ৰ কৰি চাঞ্চল্যৰ সৃষ্টি হৈছে। মৃত যুৱকজনক ওদালগুৰি জিলাৰ টংলা আৰক্ষী থানাৰ অন্তৰ্গত জালহ গাঁৱৰ মহানন্দ ডেকা মহন্তৰ পুত্ৰ হেমন্ত ডেকা বুলি চিনাক্ত কৰা হৈছে।

উল্লেখযোগ্য যে মৃতদেহ উদ্ধাৰ হোৱা হেমন্ত ডেকা ৰহস্যজনকভাৱে যোৱা ৪দিন ধৰি সন্ধানহীন হৈ আছিল।

প্ৰাপ্ত তথ্য মতে ওদালগুৰিৰ ডি আৰ ডি এ বিভাগত কনিষ্ঠ অভিযন্তা হিচাপে নিযুক্ত হেমন্তই যোৱা বৃহস্পতি বাৰ অৰ্থাৎ ১৬ মে’ত আত্মীয়ৰ ঘৰৰ পৰা নিজ গৃহলৈ বুলি উভতি অহাৰ পিছৰে নিখোজ হৈ আছিল।

বৃহস্পতিবাৰৰ পৰাই যুৱকজনৰ সন্ধানত অভিযান চলাই থকা আৰক্ষীয়ে আজি মৃতদেহটোক উদ্ধাৰ কৰাৰ পূৰ্বে দৰঙৰ ৰঙামাটি পথৰ আউলাচউকাৰ সমীপত তেওঁৰ মটৰ চাইকেল আৰু চেণ্ডেলযোৰ উদ্ধাৰ কৰিছিল।

আনহাতে আক্ৰাছুৰ পশ্চিম ওদালগুৰি সমিতিৰ লগতে অঞ্চলটোৰ বিভিন্ন দল-সংগঠনে উক্ত ঘটনাৰ উচ্চ পৰ্য্যায়ৰ তদন্তৰ দাবী জনাইছে।