পৰ্ণ ভিডিঅ’ নোচোৱাই হ’ল কাল ! কলিয়াবৰৰ বামুণীৰ মথৌখাটত লোমহৰ্ষক হত্যাকাণ্ড

কলিয়াবৰৰ বামুণীৰ মথৌখাটত সোমবাৰে সংঘটিত লোমহৰ্ষক হত্যাকাণ্ডৰ এক ভয়ানক তথ্য পোহৰলৈ আহিছে।

ৰূপালী ৰবিদাস নামৰ এগৰাকী ছয় বছৰীয়া কন্যা শিশুৰ মৃতদেহ সোমবাৰে বিয়লি ঘৰৰ সন্মুখত থকা বজৰং শিলৰ কোৱেৰীত উদ্ধাৰ হৈছিল। কোৱেৰীটোৰ শৌচালয়ত উদ্ধাৰ হৈছিল মৃতদেহটো। মৃতদেহৰ বিভিন্ন স্থানত চোকা অস্ত্ৰৰ আাঘাটৰ চিন স্পষ্ট হৈ আছিল।

হত্যাকাণ্ড সন্দৰ্ভত অভিযান চলাই হত্যাকাণ্ডত জড়িত দুজন ১১ বছৰীয়া আৰু এজন ৮ বছৰীয়া শিশুক বুধবাৰে আটক কৰিবলৈ সক্ষম হয় নগাঁও আৰক্ষী।

আৰক্ষীৰ তদন্তত ফাদিল হয় হত্যাকাণ্ড সংঘটিত হোৱাৰ মূল কাৰণ। এই ভয়ানক হত্যাকাণ্ডৰ মূল কাৰণে চাঞ্চল্যৰ সৃষ্টি কৰিছে।

আৰক্ষীৰ তদন্তত প্ৰকাশ পোৱা অনুসৰি তিনি শিশুৰ সৈতে অশ্লীল ভিডিঅ ছবি চাবলৈ অমান্তি হোৱা ৰূপালী ৰবিদাস নামৰ ৬ বছৰীয়া কন্যা শিশু গৰাকীক তিনি শিশুৱে নিৰ্মম ভাবে প্ৰহাৰ কৰি হত‍্যা কৰি পেলাই থৈছিল শিলভঙা উদ্যোগটিৰ শৌচালয়ত।

হত্যাৰ বলি হোৱা কন্যা শিশুগৰাকীৰ ঘৰৰ ওচৰৰে তিনি শিশুৱে কন্যা শিশুগৰাকীক সোমবাৰে তেনে অশ্লীল ভিডিঅ চাবলৈ বাধ্য কৰাব বিচাৰে। কিন্তু কন্যা শিশু গৰাকীয়ে তেনে ভিডিঅ চাবলৈ আপত্তি কৰাৰ পৰিণতিত কন্যা শিশু গৰাকীক হত্যা কৰা বুলি পোহৰলৈ আহিছে আৰক্ষীৰ তদন্তত।

নগাঁও জিলা আৰক্ষী অধীক্ষক আনন্দ মিশ্ৰৰ তৎপৰতাতে কলিয়াবৰ আৰক্ষী থানাৰ ভাৰপ্ৰাপ্ত আৰক্ষী বিষয়া ৰাজীৱ বৰুৱাৰ নেতৃত্বত আৰক্ষীয়ে হত্যাকাণ্ডৰ ঘটনা পোহৰলৈ অনাৰ লগতে আৰক্ষীয়ে আটক কৰিবলৈ সক্ষম হৈছে তিনি অভিযুক্ত শিশুক। সম্প্ৰতি তিনিও শিশুকে  ন্যায়ালয়ৰ নিৰ্দেশত বিশেষ তদাৰক কেন্দ্ৰলৈ প্ৰেৰণ কৰা হৈছে ৷

ঘটনা সন্দৰ্ভত এগৰাকী শিশুৰ পিতৃ-মাতৃও গ্ৰেপ্তাৰ হোৱাৰ সম্ভাৱনা আছে। হত্যাকাণ্ড সন্দৰ্ভত অৱগত হৈও আৰক্ষীক সহযোগ কৰা নাছিল তেওঁলোকে।