কৰ’না ভাইৰাছত আক্ৰান্ত হৈ এদিনতে সৰ্বাধিক ২,১০৮জন লোকৰ মৃত্যু আমেৰিকাত
সমগ্ৰ বিশ্বতে কৰ’না ভাইৰাছৰ সংক্ৰমণৰ ফলত আতংকই ছানি ধৰিছে। মাৰাত্মক এই বাইৰাছ প্ৰতিৰোধৰ বাবে আনকি বহুকেইখন দেশে লকডাউনো ঘোষণা কৰিছে।
কৰ’না ভাইৰাছত আক্ৰান্ত হৈ ইতিমধ্যে বিশ্বত ১ লাখৰো অধিক লোকে মৃত্যুবৰণ কৰিছে।
এই মুহূৰ্তত কৰ’না ভাইৰাছৰ দ্বাৰা আটাইতকৈ অধিক ক্ষতিগ্ৰস্ত হৈছে আমেৰিকা যুক্তৰাষ্ট্ৰৰ নিউয়ৰ্ক চহৰ।ইয়াত মৃত্যুৰ সংখ্যা যিদৰে বাঢ়িছে, সেইদৰে বাঢ়িছে আক্ৰান্তৰ সংখ্যাও।
মাৰাত্মক এই মহামাৰী কৰ’না ভাইৰাছৰ ফলত এদিনতে ২হাজাৰতকৈয়ো অধিক লোকে মৃত্যুক সাৱটি লোৱা বিশ্বৰ প্ৰথমখন দেশ হৈ পৰিল আমেৰিকা।
বাতৰি অনুসৰি, বিগত ২৪ ঘন্টাত দেশখনত ২,১০৮জন লোকৰ মৃত্যু হৈছে। দেশখনত এতিয়ালৈকে ৫লাখ ২ হাজাৰ ৮৭৬জন লোক কৰ’না ভাইৰাছত আক্ৰান্ত হৈছে।
দেশখনত এতিয়ালৈকে মুঠ ১৮হাজাৰ ৭৪৭জন লোকে প্ৰাণ হেৰুৱাইছে। আনহাতে, ২৭হাজাৰ ৩১৪জন ৰোগী চিকিৎসাৰ ফলত সুস্থ হৈ উঠিছে।
ইপিনে, কৰ’নাৰ প্ৰভাৱত আমেৰিকাত প্ৰায় ১ কোটি ৭০লাখ লোক কৰ্মহীন হৈ পৰিছে। চৰকাৰে নাগৰিকসকলৰ বাবে ২ লাখ কোটি ডলাৰৰ আৰ্থিক সাহায্য পেকেজ ঘোষণা কৰিছে।
দেশখনত এতিয়া এক বিপৰ্যস্ত অৱস্থা। প্ৰতিদিনে শ শ লোক মৃত্যুমুখত পৰিছে। হাস্পাতলৰ মৰ্গত মৃতদেহ ৰখাৰ ঠাই নাই। আনকি, মৃতদেহবোৰ বিচাৰি অহা কোনো দাবীদাৰো নাই। মৃতদেহবোৰ অঁতৰোৱাৰ বাবে এতিয়া গণকবৰ তৈয়াৰ কৰা হৈছে।
আমেৰিকা যুক্তৰাষ্ট্ৰত বিগত চাৰিদিনত প্ৰায় ৮হাজাৰ লোকে কৰ’না ভাইৰাছৰ ফলত প্ৰাণ হেৰুৱাইছে।