বিশ্বৰ দৰবাৰত ভাৰত! ডব্লিউ আই পি অ’ৰ ন্যায়াধীশ  ব’ৰ্ডৰ অধ্যক্ষ হ’ল ন্যায়াধীশ প্ৰতিভা এম সিং

দিল্লী উচ্চ ন্যায়ালয়ৰ ন্যায়াধীশ প্ৰতিভা এম সিঙে ভাৰতীয় ন্যায়পালিকাৰ বাবে এক গৌৰৱময় মুহূৰ্তৰ সৃষ্টি কৰিলে। অহা দুবছৰৰ বাবে (২০২৫-২০২৭) তেওঁ বিশ্ব বৌদ্ধিক সম্পত্তি সংস্থাৰ (WIPO) ন্যায়াধীশসকলৰ উপদেষ্টা মণ্ডলীৰ অধ্যক্ষ হিচাপে নিযুক্তি লাভ কৰিছে।

ৰাষ্ট্ৰসংঘত ভাৰতৰ স্থায়ী মিছনে (Geneva Mission of India) এই খবৰটো টুইট কৰি লিখিছে, “ভাৰতৰ বাবে এক গৌৰৱৰ মুহূৰ্ত!”

ডব্লিউ আই পি অ’ৰ এই বিশেষ ব’ৰ্ড আন্তঃৰাষ্ট্ৰীয় পৰ্যায়ৰ ন্যায়াধীশসকলৰে গঠিত। ইয়াত বিভিন্ন দেশৰ ন্যায়াধীশসকলে বৌদ্ধিক সম্পত্তি আইন আৰু ন্যায়পালিকাৰ বিভিন্ন দিশৰ ওপৰত আলোচনা কৰি নতুন দিশ আগবঢ়াই বিশ্ব ন্যায় ব্যৱস্থাক আধুনিকীকৰণৰ পথ দেখুৱাইছে।

ন্যায়াধীশ প্ৰতিভা এম সিং বৌদ্ধিক সম্পত্তি (আই পি) আইনৰ ক্ষেত্ৰত অভিজ্ঞ নাম। দিল্লী উচ্চ ন্যায়ালয়ত যোগদান কৰাৰ পূৰ্বে এই ক্ষেত্ৰত অধিবক্তা হিচাপে বহুদিন কাম কৰিছিল। আন্তঃৰাষ্ট্ৰীয় স্বীকৃতি লাভ কৰা তেওঁৰ এই নিযুক্তিয়ে নিঃসন্দেহে ভাৰতীয় ন্যায়পালিকাক নতুন উচ্চতালৈ লৈ যাব।

ভাৰতীয় আইনী আৰু ন্যায়িক সমাজৰ বহুতেই বিশ্বাস কৰে যে এই পদক্ষেপ কেৱল ভাৰতৰ বাবেই নহয়, দক্ষিণ এছিয়াৰ বাবেও এক বৃহৎ সন্মান। ইয়াৰ উপৰিও বৌদ্ধিক সম্পত্তি আইন, প্ৰযুক্তি আৰু উদ্ভাৱনৰ ক্ষেত্ৰত ভাৰতৰ ক্ৰমবৰ্ধমান গুৰুত্বৰো ইয়াত প্ৰতিফলন ঘটিছে।