স্থায়ী সমিতিৰ নিৰ্বাচনৰ পূৰ্বে মোক্ষম আঘাত! আপ পাৰিষদৰ বিজেপিত যোগদান

শুকুৰবাৰে ২৪ ফেব্ৰুৱাৰীত দিল্লী এমচিডিৰ স্থায়ী সমিতিৰ ৬ জন সদস্যৰ নিৰ্বাচন অনুষ্ঠিত হৈছে। দিল্লী পৌৰ নিগমৰ স্থায়ী সমিতিৰ ছয়জন সদস্যৰ নিৰ্বাচনৰ বাবে ভোটদান আৰম্ভ হোৱাৰ কিছু সময়ৰ পূৰ্বেই কেজৰিৱালৰ আম আদমি পাৰ্টিক মোক্ষম আঘাত দিছে এগৰাকী আপ পাৰিষদে। বাৱানাৰ পৰা নিৰ্বাচিত আম আদমি পাৰ্টিৰ কাউন্সিলৰ পৱন ছেহৰাৱাটে ভাৰতীয় জনতা পাৰ্টিত যোগদান কৰিছে।

আপৰ পাৰিষদজনে বিজেপিত যোগদান কৰাৰ পাছতে দিল্লীৰ বিজেপি নিজৰ টুইটাৰ হেণ্ডেলত টুইট কৰিছে। “কেজৰিৱালক মোক্ষম আঘাত, আপৰ গুণ্ডাগিৰি আৰু দুৰ্নীতিত অতিষ্ঠ হৈ বাৱানাৰ ৩০ নং ৱাৰ্ডৰ আম আদমী পাৰ্টিৰ কাউন্সিলৰ পৱন ছেহৰাৱাট ডাঙৰীয়াই বিজেপিত যোগদান কৰে।”

ইফালে বিজেপিত যোগদান কৰাৰ পাছতে সংবাদমেল সম্বোধন কৰি বাৱানাৰ আপৰ সদ্যপ্ৰাক্তন কাউন্সিলৰ পৱন ছেহৰাৱাটে কয় যে আপৰ গুণ্ডাগিৰি আৰু দুৰ্নীতিত তেওঁ বিৰক্ত হৈ পৰিছে।

পৱন ছেহৰাৱাটে কয়, “অৰবিন্দ কেজৰিৱালৰ চৰকাৰত যি দুৰ্নীতি সংঘটিত হৈ আহিছে, আপৰ দুৰ্নীতিয়ে আমাক শ্বাসৰুদ্ধ কৰি তুলিছে।”

আপৰ পাৰিষদজনে বিজেপিত যোগ দিয়াৰ পাছতে আপৰ বিধায়ক আতিশী মাৰ্লেনাই প্ৰতিক্ৰিয়া প্ৰকাশ কৰিছে। প্ৰতিক্ৰিয়া প্ৰকাশ কৰি বিধায়ক মাৰ্লেনাই কয় যে বিজেপিয়ে নিৰ্বাচনত জয়ী নহ’লে, আন এটা দলকো চৰকাৰ গঠন কৰিবলৈ নিদিয়াটো এক নিয়মত পৰিণত হৈছে। আজি এমচিডিত যি কৰা হৈছে আৰু কাইলৈ যিকোনো ৰাজ্যতে বিজেপিয়ে এনে কাম কৰিব।

দিল্লীৰ নতুন মেয়ৰ হিচাপে আপৰ শ্বেলী অ’বেৰয় নিৰ্বাচিত হোৱাৰ পাছত বুধবাৰে সন্ধিয়া স্থায়ী সমিতিৰ নিৰ্বাচন আৰম্ভ হয়। ইয়াৰ পিছতে স্থায়ী সমিতিৰ সদস্য নিৰ্বাচনৰ পূৰ্বে সদনত যথেষ্ট হুলস্থুলীয়া পৰিৱেশৰ সৃষ্টি হয়।

আপ আৰু বিজেপিৰ সদস্যসকলৰ মাজত পানীৰ বটল, ফল-মূল নিক্ষেপ কৰাৰ লগতে ইজনে সিজনক টনা-আজোৰা কৰা দেখা গৈছিল। দুয়োটা দলৰ কাউন্সিলাৰেও সদনত বেলট বাকচো নিক্ষেপ কৰে যাৰফলত নিৰ্বাচন স্থগিত ৰখা হৈছিল। সেই নিৰ্বাচন আজি শুকুৰবাৰে পুনৰ অনুষ্ঠিত হৈছে।