দিল্লীত CPIM কাৰ্যালয়ত ঐশী ঘোষক বিচাৰি উপস্থিত দিল্লী আৰক্ষী, বাওঁপন্থী কর্মীসকলৰ তীব্ৰ বাধাৰ পিছত খালী হাতেৰে ঘূৰিল দল

দিল্লীত CPIM ৰ কেন্দ্ৰীয় মুখ্য কাৰ্যালয় এ কে গোপালন ভৱনত ঐশী ঘোষক বিচাৰি হঠাৎ উপস্থিত হয় দিল্লী আৰক্ষীৰ এটা দল। দিনচেৰেক পূৰ্বে ককৰোচ জনতা পাৰ্টীৰ এক প্ৰতিবাদী কাৰ্যসূচীত সক্ৰিয়ভাৱে অংশগ্ৰহণ কৰি সমুখৰ পৰা নেতৃত্ব দিছিল এছ এফ আই নেত্ৰী ঐশী ঘোষে। সেই প্ৰতিবাদৰ ঠিক পিছতেই ঐশীক সোধ–পোছ কৰাৰ উদ্দেশ্যে আৰক্ষী পোনপটীয়াকৈ CPIM কাৰ্যালয়ত উপস্থিত হয়। কিন্তু কাৰ্যালয়ত উপস্থিত থকা বাওঁপন্থী সমৰ্থকসকলৰ প্ৰতিবাদ আৰু বাধাৰ বাবে শেষত আৰক্ষীৰ দলটো ওভতি যাবলৈ বাধ্য হয়।

মঙ্গলবাৰে বিয়লিৰ ভাগত হঠাৎ দিল্লী আৰক্ষীৰ এটা দল এ কে গোপালন ভৱনত উপস্থিত হয়। বৰ্তমান সময়ত এই কাৰ্যালয়টোতেই ঐশী ঘোষৰ কৰ্মস্থল। আৰক্ষীয়ে ঐশীক সোধ–পোছ কৰাৰ বাবে পাৰ্টি অফিচত প্ৰৱেশ কৰিবলৈ চেষ্টা কৰাৰ সময়তেই তাত উপস্থিত থকা CPIM, এছ এফ আই আৰু ডিৱাইএফআইৰ সদস্যসকলে বাধা হৈ থিয় দিয়ে। সেই সময়ত বাওঁপন্থী দলৰ কেইবাজনো সাংসদো তাত উপস্থিত আছিল। তেওঁলোকৰ তীব্ৰ বিৰোধিতাৰ বাবেই আৰক্ষীয়ে ঐশীক কোনো প্ৰশ্ন নকৰাকৈয়ে ঘূৰি যাবলগীয়া হয়।

মন কৰিবলগীয়া যে ককৰোচ জনতা পাৰ্টীৰ আন্দোলন সামৰাৰ পূৰ্বে কেন্দ্ৰীয় চৰকাৰৰ সৈতে হোৱা চুক্তিত স্পষ্টভাৱে উল্লেখ আছিল যে এই আন্দোলনত অংশ লোৱা কাৰো বিৰুদ্ধে কোনো আইনী ব্যৱস্থা গ্ৰহণ কৰা নহব আৰু ৰুজু হোৱা গোচৰসমূহো প্ৰত্যাহাৰ কৰা হব। এনে পৰিস্থিতিত ঐশীক বিচাৰি আৰক্ষী CPIM দপ্তৰত উপস্থিত হোৱা বিষয়টোক লৈ নানা প্ৰশ্নৰ সৃষ্টি হৈছে। অৱশ্যে আৰক্ষীৰ সূত্ৰই দাবী কৰিছে যে এই প্ৰতিবাদৰ সৈতে জড়িত কোনো নতুন গোচৰত নহয়, বৰঞ্চ এটা পুৰণি গোচৰৰ সন্দৰ্ভতহে সোধ–পোছ কৰিবলৈ আৰক্ষী তাত উপস্থিত হৈছিল।

সমগ্ৰ ঘটনাটোক CPIM দলে ৰাজনৈতিক প্ৰতিশোধমূলক পদক্ষেপ বুলি অভিহিত কৰিছে। তেওঁলোকৰ অভিযোগ অনুসৰি আন্দোলনত অংশ লোৱা নেতাসকলক বেলেগ উপায়েৰে বিপদত পেলাবলৈ কেন্দ্ৰই এই চেষ্টা চলাইছে। এই বিষয়ত অপ্ৰত্যাশিতভাৱে বাওঁপন্থীসকলৰ সমৰ্থনত থিয় দিছে তৃণমূল কংগ্ৰেছৰ সাংসদ কল্যাণ বেনাৰ্জী। তেওঁ ঐশী ঘোষৰ বিৰুদ্ধে লোৱা আৰক্ষীৰ এই পদক্ষেপক তীব্ৰ ভাষাৰে গৰিহণা দিয়ে।