ইমান স্পৰ্দ্ধা! দিল্লী বিশ্ববিদ্যালয়ত লব্ধপ্ৰতিষ্ঠ ইতিহাসবিদ ইৰফান হাবিবলৈ পানী নিক্ষেপ, ABVPলৈ অভিযোগৰ আঙুলি

বৃহস্পতিবাৰে দিল্লী বিশ্ববিদ্যালয়ৰ উত্তৰ চৌহদত এক অপ্ৰীতিকৰ পৰিস্থিতিৰ সৃষ্টি হয়। বিশ্ববিদ্যালয়খনৰ কলা অনুষদৰ সমীপত আই আই এছ এৰ উদ্যোগত অনুষ্ঠিত হোৱা পিপলছ লিটাৰেচাৰ ফেষ্টিভেলত বিশিষ্ট ইতিহাসবিদ তথা অধ্যাপক এছ ইৰফান হাবিবে ভাষণ দি থকাৰ সময়তে তেওঁলৈ লক্ষ্য কৰি কোনোবাই পানীৰ বাল্টি আৰু ডাষ্টবিন নিক্ষেপ কৰে। এই ঘটনাক লৈ বৰ্তমান বিশ্ববিদ্যালয়খনৰ ছাত্ৰ ৰাজনীতিত তীব্ৰ চাঞ্চল্যৰ সৃষ্টি হৈছে। দিল্লী বিশ্ববিদ্যালয়ৰ সৰ্বভাৰতীয় ছাত্ৰ ফেডাৰেশ্যনে এই কাণ্ডৰ বাবে অখিল ভাৰতীয় বিদ্যাৰ্থী পৰিষদ চমুকৈ এবিভিপিৰ সদস্যসকলক দোষাৰোপ কৰিছে। অৱশ্যে এবিভিপিয়ে এই অভিযোগ সম্পূৰ্ণৰূপে অস্বীকাৰ কৰিছে।

ঘটনাটোৰ বিৱৰণী অনুসৰি হাবিবে মঞ্চত ভাষণ দি থকা অৱস্থাত এখন বেনাৰৰ আঁৰৰ পৰা হঠাৎ এটা পানীৰ বাল্টি তেওঁলৈ নিক্ষেপ কৰা হয়। ইয়াৰ কিছু মুহূৰ্তৰ পিছতে এটা ডাষ্টবিনো তেওঁৰ ফালে দলিয়াই দিয়া হয়। এই আকস্মিক ঘটনাত অনুষ্ঠানটো অলপ সময়ৰ বাবে থমকি ৰয় যদিও হাবিবে ধৈৰ্য্য নেহেৰুৱাই পুনৰ চাৰি-পাঁচ মিনিটমান ভাষণ প্ৰদান কৰে। এই সমগ্ৰ কাণ্ডৰ এটা ভিডিঅ’ বৰ্তমান ছ’চিয়েল মিডিয়া যোগে ব্যাপকভাৱে প্ৰচাৰ হৈছে। হাবিবে এই সন্দৰ্ভত সংবাদ মাধ্যমক জানিবলৈ দিয়ে যে তেওঁ ইতিহাস আৰু ইয়াৰ পুনৰ লিখনৰ বিষয়ত কথা পাতি থকাৰ সময়তে এই আক্ৰমণৰ সন্মুখীন হয়। তেওঁ কয় যে যদি কাৰোবাৰ তেওঁৰ মতৰ সৈতে অমিল আছে, তেন্তে তেওঁলোকে আলোচনা বা সংলাপৰ মাধ্যমেৰে আগবাঢ়িব লাগে, এনেদৰে হিংসাৰ আশ্ৰয় লোৱাটো অনুচিত।

এই কাণ্ডক লৈ ছাত্ৰ সংগঠন আইছাই এক বিবৃতিত তীব্ৰ প্ৰতিক্ৰিয়া প্ৰকাশ কৰিছে। তেওঁলোকে ইয়াক সামাজিক ন্যায় আৰু প্ৰান্তীয় লোকৰ কণ্ঠৰ বাবে উৎসৰ্গিত মঞ্চৰ ওপৰত এক সংগঠিত আক্ৰমণ বুলি অভিহিত কৰিছে। সংগঠনটোৱে অভিযোগ কৰিছে যে হাবিবে ভাষণ দি থকাৰ সময়ত এবিভিপিৰ সদস্যসকলে মঞ্চত আক্ৰমণ চলাইছিল আৰু ভাবুকিপূৰ্ণ শ্লোগান দিছিল। ইফালে এবিভিপিয়ে আইছাৰ এই অভিযোগক ভিত্তিহীন আৰু মিছা বুলি ঘোষণা কৰিছে। তেওঁলোকৰ মতে বাওঁপন্থী ছাত্ৰ গোটসমূহে কেম্পাছত এবিভিপিৰ জনপ্ৰিয়তা সহ্য কৰিব নোৱাৰি এনেদৰে বিভ্ৰান্তিকৰ তথ্য বিয়পাইছে। তেওঁলোকে লগতে কয় যে ইৰফান হাবিবৰ দৰে ইতিহাসবিদক সমাজ আৰু ছাত্ৰ-ছাত্ৰীয়ে নাকচ কৰিছে আৰু এই গোটেই ঘটনাটো এবিভিপিক বদনাম কৰাৰ বাবে এক পৰিকল্পিত নাটক। ইফালে বিশ্ববিদ্যালয় কৰ্তৃপক্ষই জনোৱা মতে তেওঁলোকে এতিয়ালৈকে এই সন্দৰ্ভত কোনো আনুষ্ঠানিক অভিযোগ পোৱা নাই, যদিও সমগ্ৰ বিষয়টো তেওঁলোকে পৰ্যবেক্ষণ কৰিছে।