পাঠশালাত বিধ্বংসী ধুমুহা: তচ-নচ কৰিলে এটি পৰিয়ালৰ বাসগৃহ
যোৱা নিশা অহা প্ৰচণ্ড ধুমুহা-বৰষুণত পাঠশালাৰ দহিংৰী বামুণচোপা গাঁৱৰ এটি পৰিয়ালৰ বাসগৃহ ভাঙি-খহি পৰে।
কপিল দাসৰ সপোনৰ বাসগৃহখন ধুমুহাই ভাঙি চুৰমাৰ কৰি পেলায়।
ঘৰৰ টিঙৰ চালি ধুমুহাই উৰুৱাই লৈ যোৱাৰ ফলত ওৰাটো নিশা এটি কণমানি শিশুৰ সৈতে স্বামী-স্ত্ৰীয়ে উজাগৰে তথা বহু কষ্টৰে কটাবলগীয়া হয়।
ঘৰৰ বাঁহৰ বেৰা খহি পৰাৰ লগতে সকলো আচবাবো ধুমুহাই নষ্ট কৰি পেলায়।
ইয়াৰোপৰি বৰ্তমানলৈকে পাঠশালা মহকুমা প্ৰশাসনে পৰিয়ালটোৰ ক্ষয়-ক্ষতিৰ কোনোধৰণৰ বুজ নোলোৱাৰ অভিযোগ তোলে পৰিয়ালটোৰ মুৰব্বী কপিল দাসে।
ঘৰটো পুনৰ মেৰামতি কৰিব পৰাকৈ আৰ্থিক ভাৱেও স্বচ্ছল নহয় পৰিয়ালটো। সেয়েহে চৰকাৰক গৃহটো পুনৰ নিৰ্মাণ কৰি দিবলৈ পৰিয়ালটোৱে বিনম্ৰতাৰে অনুৰোধ জনায়।
উল্লেখযোগ্য যে, কালি মাজনিশা অহা ধুমুহা বৰষুণজাকে ৰাজ্যৰ বিভিন্ন প্ৰান্তত বিস্তৰ ক্ষতি সাধন কৰে।