পি পি ই কিট পিন্ধি কোভিড ৰোগীৰ কাষত ধুবুৰীৰ জিলা উপায়ুক্ত অন্বামুথন এম পি

ধুবুৰী জিলাৰ কোভিড পৰিস্থিতি নিয়ন্ত্ৰণৰ বাবে দিনে নিশাই প্ৰচেষ্টা অব্যাহত ৰাখিছে জিলাখনৰ নৱনিযুক্ত উপায়ুক্ত অন্বামুথন এম পিয়ে৷

যোৱা  ২২ মে’ত দায়িত্ব লোৱাৰ পাছৰে পৰা উপায়ুক্তগৰাকীয়ে জিলা প্ৰশাসনৰ শীৰ্ষ বিষয়া আৰু স্বাস্থ্য বিভাগৰ বিষয়াক লগত লৈ জিলাখনৰ কোভিড চিকিৎসালয়, প্ৰতিষেধক প্ৰদান কেন্দ্ৰ আদি পৰিদৰ্শন কৰি সৰ্বসাধাৰণ লোকৰ স্বাস্থ্যসেৱাত যাতে কোনোধৰণৰ হীন দেড়ি নহয় তাক নিশ্চিত কৰাৰ চেষ্টা অব্যাহত ৰাখিছে৷

জিলা উপায়ুক্তগৰাকীয়ে আজি ধুবুৰী অসামৰিক চিকিৎসালয়ত থকা কোভিড হাস্পতালত উপস্থিত হৈ পি পি ই কিট পিন্ধি চিকিৎসাধীন ৰোগীসকলৰ স্বাস্থ্যৰ অৱস্থা আৰু তেওঁলোকে লাভ কৰা সা-সুবিধাৰ বুজ লয়৷

জিলা উপায়ুক্তগৰাকীয়ে বিশেষকৈ কোভিড ৰোগীসকলে পৰ্যাপ্ত অক্সিজেন লাভ কৰিছেনে সেই সন্দৰ্ভত জানিবলৈ বিচাৰে৷ চিকিৎসাধীন ৰোগীসকলে প্ৰয়োজনৰ সময়ত পৰ্যাপ্ত অক্সিজেন আৰু অন্যান্য সুবিধা লাভ কৰা বুলি উপায়ুক্তগৰাকীক জনায়৷

ধুবুৰী অসামৰিক চিকিৎসালয়ৰ অধীক্ষক ডাঃ বি কে দাস, কোভিড ৱাৰ্ডৰ নডেল বিষয়া ডাঃ ইফটিকাৰ ৰহমানে কোভিড ৱাৰ্ডৰ ভিতৰত কৰা পৰ্যবেক্ষণত উপায়ুক্তগৰাকীক সংগ দিয়ে৷

ধুবুৰী অসামৰিক চিকিৎসালয়ৰ অধীনত ডি আৰ ডি এ অতিথি নিবাসত ৩০ খন আৰু চিকিৎসালয়খনৰ ওপৰ মহলাত ৬খন সহ মুঠ ৩৬খন কোভিড ৰোগীৰ চিকিৎসা বিচনা আছে৷ জিলা উপায়ুক্তগৰাকীয়ে অতিৰিক্ত ২০খন বিচনা যোগ দিবলৈ নিৰ্দেশ দিয়ে৷

আনহাতে, জিলা উপায়ুক্তগৰাকীয়ে কালি জিলাখনৰ প্ৰতিষেধক প্ৰদান কেন্দ্ৰবোৰ পৰিদৰ্শন কৰে আৰু আৰক্ষী ৰিজাৰ্ভ চিকিৎসালয়ক আদৰ্শ প্ৰতিষেধক প্ৰদান কেন্দ্ৰলৈ পৰ্যবেসিত কৰাৰ প্ৰস্তাৱ দিয়ে৷

কালি তেওঁ বিলাসীপাৰা আদৰ্শ চিকিৎসালয়ো পৰিদৰ্শন কৰে আৰু চিকিৎসালয়খনক এশখন বিচনাযুক্ত কোভিড কেয়াৰ কেন্দ্ৰলৈ পৰ্যবেশিত কৰাৰ প্ৰস্তাৱ আগবঢ়ায়৷

ধুবুৰী জিলা উপায়ুক্তগৰাকীয়ে কালি শৰৎ চন্দ্ৰ সিংহ কৃষি মহাবিদ্যালয়ো পৰিদৰ্শন কৰি মহাবিদ্যালয়খনক কোভিড কেয়াৰ কেন্দ্ৰলৈ পৰ্যবেসিত কৰাৰ নিৰ্দেশ আগবঢ়ায়৷