ধুবুৰী আৰক্ষীয়ে ৪৮ ঘন্টাৰ ভিতৰত জব্দ কৰিলে ১৫৬টা গৰু, গ্ৰেপ্তাৰ তিনিজন চোৰাং সৰবৰাহকাৰী
ধুবুৰী আৰক্ষীয়ে জিলাখনৰ পৰা ৪৮ ঘন্টাৰ ভিতৰত গৰুৰ অবৈধ চোৰাং ব্যৱসায়ৰ বিৰুদ্ধে অভিযান চলাই জিলাখনৰ বিভিন্ন স্থানৰ পৰা ১৫৬ টা গৰু জব্দ কৰে।
ধুবুৰী আৰক্ষীয়ে লগতে এই সন্দৰ্ভত জড়িত তিনিজন গৰুৰ চোৰাং সৰবৰাহকাৰীকো গ্ৰেপ্তাৰ কৰে।
ধুবুৰী জিলাৰ আগমনি আৰক্ষী থানা আৰু চাগলীয়া আৰক্ষী চকীৰ এক যৌথ অভিযানকাৰী দলে শনিবাৰে নিশা ৭১ টা গৰু জব্দ কৰে। বাকী কেইটা জিলাখনৰ বিভিন্ন স্থানৰ পৰা জব্দ কৰা হয়।
গৰুৰ চোৰাং ব্যৱসায়ৰ সৈতে জড়িত থকাৰ সম্পৰ্কত আৰক্ষীয়ে শনিবাৰে দুজন চোৰাং গৰু ব্যৱসায়ীক গ্ৰেপ্তাৰ কৰে।
তেওঁলোকৰ এজনক গোলকগঞ্জ আৰক্ষী থানাৰ অন্তৰ্গত পোকালাগি গাঁৱৰ মইনল হক আৰু আনজনক এই থানাৰে অন্তৰ্গত ছটো দীঘলটাৰি গাঁৱৰ আশ্ৰাফুল হক বুলি চিনাক্ত কৰা হৈছে।
আৰক্ষীয়ে গোলকগঞ্জ থানাত প্ৰিভেনশ্যন অফ ক্ৰুৱেলটি টু দ্য এনিমেল এক্টৰ ৮৪০/২০১৯ য়ু/এছ ১২০ (বি)/৩৭৯ আই পি চি আৰ/ডব্লিউ ধাৰা ১১(১)(এ)(বি) (ডি) ত এটা গোচৰ ৰুজু কৰিছে।
সেইদৰে, গৰুৰ চোৰা ব্যৱসায়ৰ বিৰুদ্ধে একেধৰণৰ অভিযানত ধুবুৰীৰ উপ আৰক্ষী অধীক্ষক (সদৰ) ত্ৰিনয়ন ভূঞাৰ নেতৃত্বত অভিযান চলাই দেওবাৰে আন এজন গৰুৰ চোৰাং ব্যৱসায়ীক গ্ৰেপ্তাৰ কৰে।
তেওঁক জিলাখনৰ গৌৰীপুৰ আৰক্ষী থানাৰ অন্তৰ্গত মধুশোলমাৰী ১ নং খণ্ড গাঁৱৰ জাহিনুৰ ইছলাম বুলি চিনাক্ত কৰা হৈছে।
আৰক্ষী ভূঞাই কয় যে প্ৰয়োজনীয় আইনী ব্যৱস্থা গ্ৰহণ কৰা হৈছে আৰু ইতিমধ্যে লাভ কৰা শুংসূত্ৰৰ ভিত্তিত পৰৱৰ্তী তালাচী অভিযান চলোৱাৰ পৰিকল্পনা কৰা হৈছে।