পৰিৱৰ্তন! ৰন্ধন গেছৰ প্ৰতিটো চিলিণ্ডাৰৰ দাম ৫০ টকাকৈ বৃদ্ধি
পাঁচ ৰাজ্যৰ বিধানসভা নিৰ্বাচনৰ ফলাফল ঘোষণাৰ পিছতে পৰিৱৰ্তনৰ কথা কৈ অহা মোদীৰ চৰকাৰে ৰন্ধন গেছৰ দামৰ লক্ষ্যণীয় পৰিৱৰ্তন ঘটালে।
চৰকাৰে দেশৰ সৰ্বসাধাৰণ জনতাৰ মূৰত ৰাম টাঙোন শোধাই একেকোবে বৃদ্ধি কৰিলে ৰন্ধন গেছৰ মূল্য।
আন্তঃৰাষ্ট্ৰীয় বজাৰত ইন্ধনৰ মূল্য বৃদ্ধিৰ দোহাই দি চৰকাৰে ঘৰুৱা ব্যৱহাৰ্য ৰন্ধন গেছৰ প্ৰতিটো চিলিণ্ডাৰৰ দাম ৫০ টকাকৈ বৃদ্ধি কৰাৰ সিদ্ধান্ত লৈছে। চৰকাৰৰ এনে সিদ্ধান্তৰ ফলত অসমৰ বিভিন্ন জিলাত ঘৰুৱা ব্যৱহাৰ্য ৰাজ সাহায্য বৰ্হিভূত একোটা ৰন্ধন গেছৰ চিলিণ্ডাৰৰ দাম ১০০০ টকাৰ ওপৰত হ’বগৈ।
বৰ্তমান গুৱাহাটী মহানগৰীত একোটা ঘৰুৱা ব্যৱহাৰ্য ৰন্ধন গেছৰ চিলিণ্ডাৰৰ মূল্য ৯৪৮.৫০ টকা হৈ আছে। এই দামৰ সৈতে এতিয়া অতিৰিক্ত ভাবে ৫০ টকাকৈ সংযোগ হ’ব।
দিল্লীত ১৪.২ কিলোগ্ৰাম ৰাজসাহায্যবিহীন চিলিণ্ডাৰৰ মূল্য এতিয়া ৯৪৯.৫০ টকা হৈ আছে।
পাঁচ কিলোগ্ৰাম ওজনৰ চিলিণ্ডাৰৰ মূল্য এতিয়া ৩৪৯ টকা হ’ব, ১৯ কিলোগ্ৰাম ওজনৰ বাণিজ্যিক চিলিণ্ডাৰৰ মূল্য এতিয়া ২০০৩.৫০ টকা হ’ব।
কলকাতাত এজন গ্ৰাহকে একোটা ৰন্ধন গেছৰ চিলিণ্ডাৰৰ বাবে পৰিশোধ কৰিব লাগিব ৯৭৬ টকা।
চেন্নাইত ৯৬৫.৫০ টকা,লক্ষ্ণৌত ৰন্ধন গেছৰ চিলিণ্ডাৰৰ দাম হ’ব ৯৮৭.৫০ টকা।