ভাৰতক ‘নৰককুণ্ড’ বুলি অভিহিত কৰিলে ড’নাল্ড ট্ৰাম্পে; বৰ্ণবাদী মন্তব্যক লৈ সৃষ্টি হৈছে বিতৰ্কৰ

এইবাৰ ভাৰতক লৈ বৰ্ণবাদী মন্তব্য কৰিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। তেওঁ ভাৰতক ‘নৰককুণ্ড’ বুলি অভিহিত কৰিছে। এছিয়াৰ বিভিন্ন প্ৰান্তৰ পৰা অনুপ্ৰৱেশকাৰীয়ে আমেৰিকালৈ আহি যিদৰে ভিৰ কৰিছে তাৰ বাবে তেওঁ ভাৰতকো কাঠগৰাত তুলিছে। তেওঁ মন্তব্য কৰে যে আমেৰিকাত উপনীত হোৱাত পলম হোৱাৰ ফলত ‘ন মাহতে কেঁচুৱা প্ৰসৱ কৰে’ বুলিও মন্তব্য কৰে।

ট্ৰাম্পে এই মন্তব্য কৰিছে চেভেজ নেচন প’ডকাষ্টত। তেওঁ আমেৰিকাৰ উচ্চতম ন্যায়ালয়ে জন্মসূত্ৰে নাগৰিকত্ব প্ৰদানৰ ব্যৱস্থাকো গৰিহণা দিয়ে। অনুষ্ঠানটোৰ সঞ্চালকগৰাকীয়ে নাগৰিকত্ব সন্দৰ্ভত গণভোট হ’ব লাগে বুলি মন্তব্য কৰে। এই সন্দৰ্ভত ট্ৰাম্পে নিজেই লিখিতভাৱে প্ৰকাশ কৰে।

ট্ৰাম্পে কয়, “ইয়াত সন্তান মানে লগে লগে নাগৰিক। তাৰ পিছত ভাৰত, চীন বা আন কোনো নৰককুণ্ডৰ পৰা গোটেই পৰিয়ালটো আহি উপস্থিত হয়।” ভাৰতীয় আৰু চীনৰ অনুপ্ৰৱেশকাৰীক ‘লেপটপ মাফিয়া’ বুলিও অভিহিত কৰে ট্ৰাম্পে। তেওঁ দাবী কৰে যে ভাৰত আৰু চীনৰ পৰা অহা অনুপ্ৰৱেশকাৰীয়ে তেওঁলোকৰ পতাকা পদদলিত কৰিছে।

ট্ৰাম্পে দাবী কৰিছে যে অনুপ্ৰৱেশকাৰীয়ে আমেৰিকাৰ আটাইতকৈ বেছি ক্ষতি কৰিছে। তেওঁৰ ভাষাত, “যদি আপুনি সকলো মাফিয়া পৰিয়ালক ধৰে, তেন্তে তেওঁলোকে (অভিবাসীসকলে) আমেৰিকাৰ আটাইতকৈ বেছি ক্ষতি কৰিছে। মই কোনো লুকঢাক নোহোৱাকৈয়ে ক’ব বিচাৰো, হাতত লেপটপ হাতত লৈ ঘুৰা গেংষ্টাৰবোৰ, তেওঁলোকে আমাক লুণ্ঠন কৰিছে। তেওঁলোকে আমাৰ সৈতে দ্বিতীয় শ্ৰেণীৰ নাগৰিকৰ দৰে ব্যৱহাৰ কৰিছে।”

ট্ৰাম্পে নিৰ্বাচিতভাৱে ভাৰতীয় আৰু চীনৰ অনুপ্ৰৱেশকাৰীক লক্ষ্য কৰি লৈছে। তেওঁ দাবী কৰে যে আভ্যন্তৰীণ কাম-কাজৰ ব্যৱস্থা এনেদৰে কৰা হৈছে যে সকলো ভাৰতীয় আৰু চীনৰ দ্বাৰা পৰিচালিত হয়। দুয়োখন দেশৰ পৰা অহা অনুপ্ৰৱেশকাৰীয়ে আমেৰিকাত ‘জন্ম পৰ্যটন’(বাৰ্থ টুৰিজম) চলাই আছে। সমাজ কল্যাণমূলক প্ৰকল্পৰ অপব্যৱহাৰ কৰিছে। অনুপ্ৰৱেশ সম্পৰ্কীয় সংবিধানত থকা বিধানসমূহ ‘আওপুৰণি’ বুলিও ট্ৰাম্পে মত প্ৰকাশ কৰে।

এই সন্দৰ্ভত ট্ৰাম্পৰ যুক্তি হ’ল সংবিধান লিখাৰ সময়ত বিমান সেৱা, টেলিভিছন, ইণ্টাৰনেট, ৰেডিঅ’ নাছিল। মানুহে বিমানত উঠি আহি ৯ মাহত সন্তান জন্ম দিয়া নাছিল। সেয়ে তেওঁ যুক্তি আগবঢ়ায় যে সময়ৰ লগে লগে পৰিৱৰ্তনৰ প্ৰয়োজন।

আমেৰিকাক অনুপ্ৰৱেশকাৰীৰ পৰা মুক্ত কৰাৰ প্ৰতিশ্ৰুতি দি দ্বিতীয়বাৰৰ বাবে ক্ষমতালৈ উভতি আহে ট্ৰাম্প। তাৰ পিছৰে পৰা তেওঁৰ চৰকাৰে কেইবাটাও কঠোৰ পদক্ষেপ গ্ৰহণ কৰা দেখা গৈছে। প্ৰব্ৰজনকাৰীক ‘এলিয়েন’ বুলি অভিহিত কৰি কঁকাল, হাত আৰু ভৰিত শিকলি বান্ধি বিভিন্ন দেশলৈ ঘূৰাই পঠিওৱা হৈছে। ভাৰতীয় অনুপ্ৰৱেশকাৰীৰ সৈতে ভাৰতত অৱতৰণ কৰিছিল আমেৰিকাৰ সামৰিক বিমান এখনো। তাৰ বাবে তীব্ৰ সমালোচনাৰ সন্মুখীন হয় নৰেন্দ্ৰ মোডী চৰকাৰ।