বন বিভাগৰ অভিযান : জখলাবন্ধাৰ পৰা আটক দুৰ্ধৰ্ষ চোৰাং চিকাৰী  

কাজিৰঙা ৰাষ্টীয় উদ্যানৰ সহকাৰী বন সংৰক্ষকৰ নেতৃত্বত যোৱা এটা অভিযানকাৰী দলে জখলাবন্ধা আৰক্ষী আৰু বন্যপ্ৰাণী অপৰাধ নিয়ন্ত্ৰন গোটৰ বিশেষ সহযোগত অভিযান চলাই জখলাবন্ধাৰ গৰুবন্ধা অঞ্চলৰ পৰা আখটাৰ আলী নামৰ এজন দুৰ্ধৰ্ষ  চোৰাং চিকাৰীক আটক কৰে।

উল্লেখযোগ্য যে, আখটাৰ আলী পূৰ্বতে কলিয়াবৰ মহকুমাৰ কুঠৰী অঞ্চলৰ বান্দৰডুবিৰ বাসিন্দা আছিল ৷ বিগত সময়ত বান্দৰডুবি অঞ্চলত অসম চৰকাৰে চলোৱা উচ্ছেদ অভিযানৰ পাচৰে পৰা আখটাৰ আলীয়ে জখলাবন্ধাত বসবাস কৰিবলৈ লৈছিল ৷

২০১৮ বৰ্ষৰ ডিচেম্বৰ মাহৰ ১৫ তাৰিখে বাগৰি বনাঞ্চলিক বিষয়াৰ কাৰ্যালয়ৰ সমীপত থকা পৰ্যটক পথৰ কাষৰ ভলুকাজান বনশিবিৰ এলেকাত হোৱা গঁড়হত্যাৰ ঘটনাৰ লগত জড়িত আছিল ধৃত আখটাৰ আলী ৷

ঘটনা সম্বন্ধে অধিক তথ্যৰ বাবে আখটাৰ আলীক বন বিভাগে জেৰা অব্যাহত ৰাখিছে। উক্ত ঘটনাৰ লগত জড়িত আন এজন চোৰাং চিকাৰী সম্প্ৰতি পলাতক অৱস্থাত আছে বুলি বন বিভাগে কৰা জেৰাৰ পৰা জানিব পৰা গৈছে৷