ছিৰিয়াত গণতন্ত্ৰ প্ৰতিষ্ঠাৰ সপোন! ছিৰিয়াত এইচ টি এছৰ নেতৃত্বত নিৰ্বাচনৰ প্ৰস্তুতি
ছিৰিয়াৰত শাসনাধীন সশস্ত্ৰ সংগঠন হায়াত তাহৰি আল-শ্বাম (এইচ টি এছ)য়ে ছেপ্টেম্বৰত অনুষ্ঠিত কৰিব সাধাৰণ নিৰ্বাচন। এইচ টি এছৰ দ্বাৰা পৰিচালিত অন্তৱৰ্তীকালীন চৰকাৰৰ মুৰব্বী মহম্মদ তাহা আল আহমেদে ৰাজ্যিক সংবাদ সংস্থা ছানাক জনোৱা মতে, ১৫ ছেপ্টেম্বৰৰ পৰা ২০ ছেপ্টেম্বৰৰ ভিতৰত এই নিৰ্বাচন অনুষ্ঠিত হ’ব।
উল্লেখ্য যে বিগত ডিচেম্বৰ মাহত এইচ টি এছ আৰু তেওঁলোকৰ মিত্ৰ ‘জয়ছ আল ইজ্জা’ৰ যুটীয়া বাহিনীয়ে ৰাজধানী ডামাস্কাছ দখল কৰি ৰাষ্ট্ৰপতি বাছাৰ আল আছাদৰ চৰকাৰৰ পতন ঘটাইছিল। এই ঘটনাৰ পিছত আছাদে পৰিয়ালৰ সৈতে মিত্ৰ দেশ ৰাছিয়ালৈ পলায়ন কৰিছিল। আৰু গৃহযুদ্ধৰ পৰিণতিত আল কায়দাৰ প্ৰাক্তন নেতা আহমেদ আল শ্বাৰাই অন্তৱৰ্তীকালীন চৰকাৰৰ ৰাষ্ট্ৰাপতিৰ দায়িত্ব গ্ৰহণ কৰে।
ক্ষমতা দখলৰ পিছৰে পৰা এইচ টি এছৰ বিৰুদ্ধে ছিয়া, ড্ৰুজ, আৰু কুৰ্দকে ধৰি বিভিন্ন সংখ্যালঘু গোটৰ ওপৰত আক্ৰমণ আৰু হত্যাকাণ্ডৰ অভিযোগ উত্থাপিত হৈ আহিছে। ইয়াৰ মাজতে চৰকাৰ সমৰ্থিত চুন্নী বেদুইন গোটৰ সংখ্যালঘু ড্ৰুজৰ ওপৰত আক্ৰমণ বন্ধ কৰিবলৈ ইজৰাইলে এই মাহত ছিৰিয়াত বিমান আক্ৰমণ চলাইছিল।
এই পৰিস্থিতিৰ মাজত ছেপ্টেম্বৰত অনুষ্ঠিত হ’বলগীয়া সাধাৰণ নিৰ্বাচন মুক্ত আৰু শান্তিপূৰ্ণ হ’ব নে নহয়, সেই বিষয়ে আন্তঃৰাষ্ট্ৰীয় পৰ্যবেক্ষকসকলে সন্দেহ প্ৰকাশ কৰিছে। এই নিৰ্বাচনৰ জৰিয়তে ছিৰিয়াত গণতান্ত্ৰিক শাসন ব্যৱস্থা প্ৰতিষ্ঠাৰ সম্ভাৱনা থাকিলেও, সংঘাত আৰু অস্থিৰতাই এই প্ৰক্ৰিয়াক জটিল কৰি তুলিছে।