শ্বাহৰুখ খানে বিজেপিত যোগদান কৰিলেই ড্ৰাগছ চেনী হৈ পৰিব! কোনে কৰিছে এই মন্তব্য!
বলিউদৰ বাদশ্বাহ শ্বাহৰুখ খানৰ পুত্ৰ আৰিয়ান খানৰ ড্ৰাগছ গোচৰৰ মাজতে কেন্দ্ৰৰ বিজেপি চৰকাৰ তথা দলক উপহাস কৰিছে মহাৰাষ্ট্ৰৰ এজন কেবিনেট মন্ত্ৰীয়ে।
মহাৰাষ্ট্ৰৰ মন্ত্ৰী ছগন ভুজবলে শনিবাৰে বিজেপি দলক উপহাস কৰি কয় যে, অভিনেতা শ্বাহৰুখ খানে যদি গেৰুৱা দলত যোগদান কৰে তেন্তে ড্ৰাগছ চেনী পাউডাৰ হৈ পৰিব।
তেওঁ লগতে অভিযোগ কৰে যে, গুজৰাটৰ মুন্দ্ৰা বন্দৰত বৃহৎ পৰিমাণৰ ড্ৰাগছ জব্দ কৰা হৈছিল, কিন্তু এই গোচৰটোৰ তদন্ত কৰাৰ পৰিৱৰ্তে নাৰ্কোটিক্স কণ্ট্ৰ’ল ব্যুৰো নামৰ কেন্দ্ৰীয় সংস্থাটোৱে শ্বাহৰুখ খানক খেদি ফুৰিছে।
উল্লেখ্য যে, মুম্বাইৰ ক্ৰুইজ শ্বিপ ড্ৰাগছ কেচত শ্বাহৰুখ খানৰ পুত্ৰ আৰিয়ান খানক গ্ৰেপ্তাৰ কৰিছিল নাৰ্কোটিক্স কণ্ট্ৰ’ল ব্যুৰোৱে। তেতিয়াৰ পৰাই সংস্থাটোৰ আৱেষ্টনীত আছে শ্বাহৰুখ তনয় আৰিয়ান।
গোচৰটোৰ সন্দৰ্ভত যথেষ্ট সক্ৰিয়তা প্ৰদৰ্শন কৰি তদন্ত অব্যাহত ৰাখিছে নাৰ্কোটিক্স কণ্ট্ৰ’ল ব্যুৰোৱে।
অথচ গুজৰাটৰ মুন্দ্ৰা বন্দৰত প্ৰায় ৩ টন ড্ৰাগছ জব্দ কৰাৰ পাছতো এই ক্ষেত্ৰত পৰ্যাপ্ত সক্ৰিয়তা দেখুওৱা নাই বুলি অভিযোগ উত্থাপন হৈছে। মুন্দ্ৰা বন্দৰ প্ৰধান মন্ত্ৰী নৰেন্দ্ৰ মোদীৰ ঘনিষ্ঠ পুঁজিপতি গৌতম আদানীৰ মালিকানাধীন হোৱাৰ বাবেই তদন্ত স্থবিৰ হৈ পৰিছে বুলি অভিযোগ উঠিছে।
এনে সময়তে ছগন ভুজবলৰ এই মন্তব্যই ব্যাপক চৰ্চা লাভ কৰিছে।