মাতাল আৰক্ষীৰ গাড়ীৰ খুন্দাত মৰ্মান্তিকভাৱে নিহত ২ শিশু, গুৰুতৰভাৱে আহত আন এটি শিশু!

আইনৰক্ষকৰ বেপোৰোৱা গাড়ীৰ খুন্দাত নিহত দুটি শিশু। হাৰিয়ানাৰ পালৱালত মদ্যপান কৰি গাড়ী চলাই তিনিটি শিশুক খুন্দিয়াই মহটিয়াই নিয়াৰ অভিযোগ উত্থাপন হৈছে এজন আৰক্ষী কৰ্মীৰ বিৰুদ্ধে। দুৰ্ঘটনাত ২ টা শিশুৰ মৃত্যু ঘটে। গুৰুতৰভাৱে আহত হৈছে আন এটা শিশু। দুৰ্ঘটনাৰ প্ৰতিবাদত অঞ্চলটো উত্তাল হৈ পৰে। প্ৰতিবাদ সাব্যস্ত কৰে স্থানীয় ৰাইজে।

সূত্ৰ অনুসৰি অভিযুক্ত আৰক্ষী জোৱানজনৰ নাম নৰেন্দ্ৰ। হাৰিয়ানা আৰক্ষীৰ হেড কনিষ্টবল আৰু নুহ ডি এছ পি কাৰ্যালয়ৰ ৰীডাৰ। অভিযোগ অনুসৰি, মঙলবাৰে পালৱালত তেওঁৰ গাড়ীয়ে তিনিটি শিশুক পথত খুন্দা মাৰে। তাতেই পাঁচ আৰু সাত বছৰ বয়সৰ দুটি শিশুৰ মৃত্যু হয়। আনটো শিশুক গুৰুতৰভাৱে আহত অৱস্থাত স্থানীয় ৰাইজে উদ্ধাৰ কৰি চিকিৎসালয়লৈ লৈ যায়।

সূত্ৰৰ পৰা জানিব পৰা মতে, শিশুকেইটাক খুন্দা মৰাৰ পিছত অভিযুক্ত আৰক্ষী জোৱানজনে গাড়ীৰ পৰা নামি পলায়ন কৰে। তেওঁক খেদি যায় স্থানীয় লোকে। মদৰ নিচাত পুলিচজন মাতাল হৈ থকা বুলি অভিযোগ উত্থাপন হৈছে। তেওঁ ভালদৰে থিয়ও হ’ব পৰা নাছিল। ইয়াৰ বিপৰীতে তেওঁ প্ৰতিবাদকাৰীক ভাবুকি দিয়াৰ অভিযোগ উত্থাপন কৰে প্ৰত্যক্ষদৰ্শীয়ে।

এই ঘটনাৰ লগে লগে অঞ্চলটোৰ ৰাইজে প্ৰতিবাদ সাব্যস্ত কৰে। আৰক্ষীয়ে ততাতৈয়াকৈ অভিযুক্তক উদ্ধাৰ কৰিবলৈ আহোঁতে স্থানীয় ৰাইজে তেওঁলোকক বাধা দিয়ে। পথ অৱৰোধ কৰে। ৰাইজে দাবী কৰে যে তেওঁলোকৰ উপস্থিতিতে অভিযুক্ত আৰক্ষী জোৱানজনক চিকিৎসা পৰীক্ষা কৰাব লাগে যাতে বিষয়টো ঢাকি ৰখা নহয়।

আৰক্ষীয়ে মৃত শিশুকেইটাৰ পৰিয়ালৰ লোকক থানালৈ লৈ যায়। তেওঁলোকৰ অভিযোগৰ ভিত্তিত অভিযুক্ত আৰক্ষী জোৱানজনক গ্ৰেপ্তাৰ কৰা হয়। অৱশ্যে তেওঁ মদ্যপান কৰিছিল নে নাই সেয়া চিকিৎসা প্ৰতিবেদনৰ পিছতহে গম পোৱা যাব বুলি আৰক্ষীয়ে জানিবলৈ দিয়ে।