DYFI protest বঙাইগাঁও ৰে’লৱে ষ্টেচনৰ যাত্ৰী পৰিসেৱাসমূহ কৰ্তনৰ প্ৰতিবাদত প্ৰতিবাদী কাৰ্যসূচী ৰূপায়ণ

বঙাইগাঁও চহৰৰ মাজমজিয়াত অৱস্থিত বঙাইগাঁও ৰে’লৱে ষ্টেচনৰ সংস্কাৰৰ নামত যাত্ৰী পৰিসেৱা ব্যাপক কৰ্তনৰ বিৰুদ্ধে আৰু ষ্টেচনৰ দুয়োফালৰ নাগৰিকৰ যাতায়াতৰ বাবে উপ পথ নিৰ্মাণৰ দাবী দেওবাৰে ডি ৱাই এফ আইৰ বঙাইগাঁও – চিৰাং জিলা কমিটিয়ে এক প্ৰতিবাদী কাৰ্যসূচী গ্ৰহণ কৰে।

বঙাইগাঁও ৰে’লৱে ষ্টেচনৰ সন্মুখত গ্ৰহণ কৰা প্ৰতিবাদী কাৰ্যসূচীৰ জৰিয়তে প্ৰতিবাদকাৰী সকলে গুৰুত্বপূৰ্ণ যাত্ৰী পৰিসেৱা যেনে ৰে’লৱে অনুসন্ধান কেন্দ্ৰ বন্ধ কৰা, আৰপিএফ ষ্টেচনৰ স্থানান্তৰ কৰা কাৰ্যৰ তীব্ৰ বিৰোধিতা কৰাৰ লগতে অৱধ আসাম এক্সপ্ৰেছ আৰু কাঞ্চনঝংঘা এক্সপ্ৰেছ বঙাইগাঁও ৰে’লৱে ষ্টেচনত ৰখোৱা আদিৰ দাবী জনায় ৷

প্ৰতিবাদী কাৰ্যসূচীৰ অন্তত সংগঠনটোৰ ৰাজ্যিক সভাপতি ৰুস্তম আলী জিলাৰ সভাপতি শুভাংকৰ ঘোষ, সম্পাদক ৰকিবুল ইছলাম আকন্দ, ধন ভৰালী অনিৰ্বাণ দাসৰ সজাতি দলে বঙাইগাঁও ৰে’লৱে ষ্টেচনৰ ষ্টেচন অধীক্ষকৰ জৰিয়তে এন এফ ৰে’লৱেৰ মহাপ্ৰৱন্ধকক স্মাৰকপত্ৰ প্ৰেৰণ কৰে। লগতে ১ নং আৰু ২ নং ফাগুনাগাঁৱৰ ৰে’ল পথৰ উত্তৰ পাৰে সষ্টি হৈ অহা কৃত্ৰিম বান পানীৰ সমস্যাটো সমাধানৰ দাবীও জনায় ৷

সংগঠনটোৱে অভিযোগ কৰা মতে ভাৰতীয় ৰে’ল বিভাগে ৰে’ল পথটো মিটাৰ গজৰ পৰিৱৰ্তে ব্ৰড গজলৈ উন্নীত কৰাৰ পৰাই প্ৰায় ৩৬ বছৰৰো অধিক সময়জুৰি বিজনী ৰাজহ চক্ৰৰ অন্তৰ্গত ১ আৰু ২ নং ফাগুনাগাঁৱৰ ৰে’ল পথৰ উত্তৰ পাৰে বসবাস কৰা ২০০ তকৈ অধিক পৰিয়াল এজাক বৰষুণতে সৃষ্টি হোৱা কৃত্ৰিম বানৰ কবলত পৰি আহিছে ৷ সেয়ে এই কৃত্ৰিম বান পানীখিনি নিষ্কাষণ কৰাৰ দাবীৰেও এখন স্মাৰক পত্ৰ প্ৰদান কৰে সংগঠনটোৱে ৷

ডি ৱাই এফ আইৰ বঙাইগাওঁ – চিৰাং জিলা কমিটিৰ নেতৃত্বত ৰূপায়ণ কৰা প্ৰতিবাদী কাৰ্যসূচীত অৰ্ধ শতাধিক লোকে অংশ গ্ৰহণ কৰি প্ৰতিবাদ সাব্যস্ত কৰে৷