মন্ত্ৰী হিমন্ত বিশ্ব শৰ্মাৰ ভাতৃ আৰক্ষী অধীক্ষক সুশান্ত বিশ্ব শৰ্মাক নিৰ্বাচন আয়োগৰ বদলিৰ নিৰ্দেশ

ভাৰতৰ নিৰ্বাচন আয়োগে এইবাৰ অসমৰ মুখ্য নিৰ্বাচনী বিষয়াক ৰাজ্যখনৰ মন্ত্ৰী হিমন্ত বিশ্ব শৰ্মাৰ ভাতৃ সুশান্ত বিশ্ব শৰ্মাক আৰক্ষী অধীক্ষকৰ পদৰ পৰা বদলি কৰিবলৈ নিৰ্দেশ দিছে।

সুশান্ত বিশ্ব শৰ্মা বৰ্তমান গোৱালপাৰা জিলাৰ আৰক্ষী অধীক্ষক হিচাপে কাৰ্যনিৰ্বাহ কৰি আছে।

‘’সুশান্ত বিশ্ব শৰ্মাক ৰাজ্যিক হেডকোৱাৰ্টাৰত কোনো উপযুক্ত পদলৈ বদলি কৰিব লাগে,’’ নিৰ্বাচন আয়োগে শুকুৰবাৰে জাৰি কৰা এখন পত্ৰত এইদৰে কয়।

নিৰ্বাচন আয়োগে লগতে ‘’ভিৰা ৰাকেশ ৰেড্ডীক তাৎক্ষণিকভাৱে কাৰ্যকৰী হোৱাকৈ গোৱালপাৰাৰ আৰক্ষী অধীক্ষক হিচাপে নিযুক্ত’’কৰাৰো নিৰ্দেশ দিয়ে।

অহা ৬ এপ্ৰিলত অসম বিধানসভাৰ তৃতীয় পৰ্যায়ৰ নিৰ্বাচনত গোৱালপাৰা জিলাতো ভোটগ্ৰহণ অনুষ্ঠিত হ’ব।

উল্লেখ্য যে ইয়াৰ পূৰ্বে হিমন্ত বিশ্ব শৰ্মাক ৪৮ ঘন্টাৰ বাবে নিৰ্বাচনী প্ৰচাৰত নিষেধাজ্ঞা জাৰি কৰিছে নিৰ্বাচন আয়োগে।

বিপিএফ প্ৰধান হাগ্ৰামা মহিলাৰীক কাৰাগাৰলৈ প্ৰেৰণ কৰাৰ ভাবুকি দিয়াৰ বাবে নিৰ্বাচন আয়োগৰ এই নিষেধাজ্ঞাৰ সন্মুখীন হৈছে প্ৰতাপী বিজেপি মন্ত্ৰীগৰাকী।

নিৰ্বাচনী প্ৰচাৰৰ সময়ত মন্ত্ৰী হিমন্ত বিশ্ব শৰ্মাই বিপিএফ প্ৰধান হাগ্ৰামা মহিলাৰীক NIAৰ দ্বাৰা গ্ৰেপ্তাৰ কৰোৱাই কাৰাগাৰত নিক্ষেপ কৰাৰ ভাবুকি দিছিল।

ইয়াৰ পিছতে মন্ত্ৰীগৰাকীৰ বিৰুদ্ধে নিৰ্বাচন আয়োগৰ ওচৰত অভিযোগ দাখিল কৰিছিল মিত্ৰজোঁটক নেতৃত্ব দিয়া কংগ্ৰেছ দলে।

উল্লেখ্য যে নিৰ্বাচনী প্ৰচাৰৰ সময়ত সংবাদ মাধ্যমৰ আগত প্ৰতাপী মন্ত্ৰীগৰাকীয়ে বিটিআৰৰ কোকৰাঝাৰত অবৈধ অস্ত্ৰ উদ্ধাৰ হোৱাৰ ঘটনাটোত জড়িত থকাৰ অভিযোগ তোলাই নহয়  বিটিআৰত পুনৰ সশস্ত্ৰ কাৰ্যকলাপ আৰম্ভ কৰিবলৈ বাথাক প্ৰৰোচিত কৰাৰ অভিযোগ তুলি নিৰ্বাচনৰ পিছতে NIAৰ দ্বাৰা হাগ্ৰামা মহিলাৰীক গ্ৰেপ্তাৰ কৰোৱাই কাৰাগাৰলৈ নিক্ষেপ কৰা হ’ব বুলি ভাবুকি প্ৰদান কৰিছিল।

মন্ত্ৰীগৰাকীয়ে ভাবুকি প্ৰদান কৰাৰ সন্দৰ্ভত কংগ্ৰেছৰ অভিযোগ পোৱাৰ পিছতে নিৰ্বাচন আয়োগে মন্ত্ৰী হিমন্ত বিশ্ব শৰ্মাৰ পৰা এই সম্পৰ্কত স্পষ্টীকৰণ বিচাৰিছিল।

ৰাজ্যিক নিৰ্বাচন বিষয়াৰ যোগেদি লাভ কৰা মন্ত্ৰী হিমন্ত বিশ্ব শৰ্মাৰ স্পষ্টীকৰণত আশ্বস্ত  নহৈ মন্ত্ৰীগৰাকীৰ বিৰুদ্ধে এই কঠোৰ নিষেধাজ্ঞা জাৰি কৰে নিৰ্বাচন আয়োগে।