অৰ্থনৈতিক সমীক্ষাত দেশৰ কৃষিক লৈ উদ্বেগ, জিডিপিত আঘাতৰ আশংকা
আগন্তুক দিনবোৰ ভাৰতীয় অৰ্থনীতিৰ বাবে একেবাৰেই মসৃণ নহয়। বহু ইতিবাচক দিশৰ মাজতো ধুমুহা আহিব বুলি অৰ্থনৈতিক সমীক্ষাত ভৱিষ্যদ্বাণী কৰা হৈছে।
জলবায়ু পৰিৱৰ্তন আৰু জল সংকটে দেশৰ কৃষিৰ ওপৰত পৰা প্ৰভাৱৰ পৰা আৰম্ভ কৰি আন্তঃৰাষ্ট্ৰীয় ভূ-ৰাজনীতিত চলি থকা অস্থিৰতালৈকে – এই সকলোবোৰে অনাগত দিনত অৰ্থনীতিক দুৰ্যোগৰ মুখত পেলোৱাৰ আশংকা কৰা হৈছে বুলি প্ৰতিবেদনত উল্লেখ কৰা হৈছে।
অহা দেওবাৰে (১ ফেব্ৰুৱাৰী) মোডী চৰকাৰৰ সাধাৰণ বাজেট দাখিল কৰা হ’ব। তাৰ পূৰ্বে পৰম্পৰা অনুসৰি আজি বৃহস্পতিবাৰে লোকসভাত অৰ্থনৈতিক জৰীপৰ প্ৰতিবেদন দাখিল কৰা হয়। ইয়াক উপস্থাপন কৰে কেন্দ্ৰীয় বিত্তমন্ত্ৰী নিৰ্মলা সীতাৰমনে।
মুখ্য অৰ্থনৈতিক উপদেষ্টা ভি. অনন্ত নাগেশ্বৰনে প্ৰস্তুত কৰা এই প্ৰতিবেদনত দেশৰ কৃষি খণ্ডৰ সমস্যা বিশেষ গুৰুত্ব লাভ কৰিছে। মোডী চৰকাৰে ২০৪৭ চনৰ ভিতৰত ‘উন্নত ভাৰত’ৰ সপোন দেখুৱাইছে। এই লক্ষ্য পূৰণত কৃষিয়ে বিশেষ ভূমিকা ল’ব। শেহতীয়াকৈ বৃদ্ধি পোৱাৰ পাছতো এই খণ্ডটো উৎপাদনৰ বিভিন্ন সমস্যাই জুৰুলা কৰিছে বুলি প্ৰতিবেদনত সকীয়াই দিয়া হৈছে।
এইবাৰৰ অৰ্থনৈতিক প্ৰতিবেদনত উল্লেখ কৰা হৈছে যে ২০২৬-২৭ বিত্তীয় বৰ্ষত দেশৰ জিডিপিৰ বৃদ্ধিৰ হাৰ কিছু হ্ৰাস পোৱাৰ সম্ভাৱনা আছে। ইয়াৰ হাৰ ৬.৮ শতাংশৰ পৰা ৭.২ শতাংশৰ ভিতৰত হ’ব। যিটো চলিত বিত্তীয় বৰ্ষ (২০২৫-২৬)তকৈ কিছু কম।
চলিত বিত্তীয় বৰ্ষত জিডিপি বৃদ্ধিৰ হাৰ ৭.৪ শতাংশ হোৱাৰ ভৱিষ্যদ্বাণী কৰিছে চৰকাৰ তথা বিভিন্ন সংস্থাই। অৰ্থাৎ অহা বিত্তীয় বৰ্ষত ভাৰতীয় অৰ্থনীতিয়ে যি দুৰ্যোগৰ সন্মুখীন হ’ব লগা হৈছে সেয়া এই প্ৰতিবেদনৰ পৰা স্পষ্ট হৈ পৰিছে। ইয়াৰ লগতে বিত্তীয় ঘাটি ৪.৪ শতাংশ হ’ব পাৰে।
সমীক্ষাত উল্লেখ কৰা হৈছে যে আমেৰিকাই আৰোপ কৰা বৃহৎ শুল্কৰ বোজা বহন কৰি ভাৰতীয় অৰ্থনীতিয়ে নিজৰ বৃদ্ধিৰ গতি অক্ষুণ্ণ ৰাখিছে। আমেৰিকাই ভাৰতৰ কেইবাটাও সামগ্ৰীৰ ৰপ্তানিৰ ওপৰত মুঠ ৫০ শতাংশ শুল্ক আৰোপ কৰাৰ বাবে অৰ্থনৈতিক বিকাশ হ্ৰাস পোৱাৰ আশংকা কৰা হৈছিল। কিন্তু ফলাফল আশা কৰাতকৈ ভাল হৈছে।