ED grills Sanjay Raut: ১০ ঘণ্টা ধৰি ইডিৰ জেৰাৰ সন্মুখীন হ’ল শিৱসেনাৰ নেতা সঞ্জয় ৰাউট
ED grills Sanjay Raut প্ৰৱৰ্তন সঞ্চালকালয়ে (ইডি) অবৈধ বিত্তীয় লেনদেনৰ গোচৰৰ সন্দৰ্ভত শিৱসেনাৰ নেতা তথা সাংসদ সঞ্জয় ৰাউটক ১০ ঘণ্টা ধৰি জেৰা কৰে। সঞ্জয়ে শুকুৰবাৰে পুৱা প্ৰায় ১১.৩০ বজাত দক্ষিণ মুম্বাইৰ বেলাৰ্ড ইষ্টেটৰ ইডি কাৰ্যালয়ত প্ৰৱেশ কৰিছিল। জেৰাৰ পিছত তেওঁ নিশা প্ৰায় ৯.৩০ বজাত তাৰ পৰা ওলাই আহে।
ইডিৰ কাৰ্যালয়ৰ পৰা ওলাই আহি ৰাউটে কয় যে তেওঁ তদন্তত সকলো সহায় আগবঢ়াব। তেওঁ কয়, “সংস্থাটোৰ কাম হৈছে তদন্ত কৰা। আমাৰ কাম হৈছে তদন্তত সকলো ধৰণে সহায় কৰা। ইডিয়ে মোক মাতিছিল। সেইকাৰণে মই আহিছিলো। কাইলৈ মাতিলে আকৌ আহিম।”
সঞ্জয় ৰাউট ইডি কাৰ্যালয়ত প্ৰৱেশ কৰাৰ আগতে অঞ্চলটোত বৃহৎ সংখ্যক আৰক্ষী মোতায়েন কৰা হৈছিল। ইয়াৰ কাৰণ হ’ল শিৱসেনাৰ বহুতো কৰ্মী ইতিমধ্যে তাত গোট খাইছিল। ৰাস্তাৰ দুয়োফালে বেৰিকেডো স্থাপন কৰা হৈছিল।
উল্লেখ্য যে যোৱা ২৮ জুনত ইডিয়ে সঞ্জয় ৰাউটক কাৰ্যালয়ত হাজিৰ হ’বলৈ মাতি পঠিয়াইছিল। শিৱসেনাৰ সাংসদজনে ইডিৰ চমনখনক “ৰাজনৈতিক উদ্দেশ্য প্ৰণোদিত” বুলি অভিহিত কৰিছিল। শুকুৰবাৰে তেওঁ ইডিৰ কাৰ্যালয়ত প্ৰৱেশ কৰাৰ আগ মুহূৰ্ততো তেওঁৰ কণ্ঠত এই একেই সুৰেই শুনা গৈছিল।
তেওঁ সংবাদ মাধ্যমৰ আগত কৈছিল, “মই ইডিৰ কাৰ্যালয়লৈ যাওঁ। সকলোৱে জানে যে এইটো সম্পূৰ্ণ ৰাজনৈতিক। তেওঁলোকে মাতি পঠিয়াইছে। মই এজন নাগৰিক হোৱাৰ লগতে এগৰাকী সাংসদো। ”
লগতে পঢ়ক: পুনৰ নিৰাশ উদ্ধৱ ঠাকৰে শিবিৰ: উচ্চতম ন্যায়ালয়ে খাৰিজ কৰিলে জৰুৰী শুনানিৰ আবেদন
অৱশ্যে, জেৰাৰ পৰা ওলাই অহাৰ পিছত সঞ্জয় ৰাউটৰ মুখত সেই অভিযোগ আৰু শুনা নগ’ল। ১০ ঘণ্টাজোৰা জেৰাৰ পিছত তেওঁ তদন্তত সকলোধৰণ সহায়ৰ আশ্বাস দিয়েই ঘৰলৈ খোজ লয়।