নিযুক্তি কেলেংকাৰি : বৰপেটাত জ্বলিল মুখ্য মন্ত্ৰী আৰু গ্ৰামোন্নয়ন মন্ত্ৰীৰ পুত্তলিকা

সদ্য ঘোষিত পঞ্চায়ত আৰু গ্ৰামোন্নয়ন বিভাগৰ নিযুক্তিৰ ফলাফলত ব্যাপক অনিয়ম হোৱাৰ অভিযোগ তুলি বৰপেটাত আজি কৃষক মুক্তি সংগ্ৰাম সমিতি আৰু ছাত্ৰ মুক্তি সংগ্ৰাম সমিতিয়ে ৰাজ্যৰ মুখ্য মন্ত্ৰী সৰ্বানন্দ সোণোৱাল আৰু পঞ্চায়ত- গ্ৰামোন্নয়ন মন্ত্ৰী নৱ কুমাৰ দলেৰ পুত্তলিকা দাহ কৰে ৷

দিনৰ প্ৰায় ৩ বজাত কৃষক মুক্তি আৰু ছাত্ৰ মুক্তিৰ নেতা কৰ্মীসকলে পুত্তলিকা দাহ কৰি এই নিযুক্তি সন্দৰ্ভত চিবিআইৰ তদন্তৰ দাবী জনায় ৷

ৰাজ্য চৰকাৰখন যে দুৰ্নীতিৰ বিৰুদ্ধে শূন্য সহনশীল নহয় সেই কথা পঞ্চায়ত আৰু গ্ৰামোন্নয়ন বিভাগৰ নিযুক্তিৰ ফলাফলে প্ৰমাণ কৰা বুলি কৃষক মুক্তিয়ে উল্লেখ কৰে।

মেধাৱী নিবনুৱাৰ জীৱনকলৈ হেতালি খেলা চৰকাৰখনৰ মন্ত্ৰী নৱ কুমাৰ দলেৰ পদত্যাগো দাবী জনায় কৃষক মুক্তি আৰু ছাত্ৰ মুক্তিয়ে ৷

উল্লেখযোগ্য যে শেহতীয়াকৈ ৰাজ্যখনৰ জনসংযোগ বিভাগ আৰু পঞ্চায়ত আৰু গ্ৰামোন্নয়ন বিভাগত হোৱা নিযুক্তিত ব্যাপক অনিয়ম সংঘটিত হোৱা বুলি অভিযোগ উত্থাপিত হৈছে।