আজান পীৰৰ সন্দৰ্ভত কটু মন্তব্য কৰা শিলাদিত্য দেবৰ প্ৰতিকৃতি দাহ নগাঁৱত
হোজাইৰ বিধায়ক শিলাদিত্য দেবৰ বিৰুদ্ধে আজি দুপৰীয়া নগাঁও জিলাৰ পুৰণিগুদামত গৰীয়া-মৰিয়া দেশী জাতীয় পৰিষদৰ নগাঁও জিলা সমিতিয়ে সাব্যস্ত কৰিলে তীব্ৰ প্ৰতিবাদ।
বিতৰ্কিত বিধায়ক গৰাকীয়ে আজান পীৰৰ বিৰুদ্ধে এটা ব্যক্তিগত সংবাদ মাধ্যমত ৰাজহুৱাভাবে কটু মন্তব্যৰ কৰাৰ অভিযোগ উত্থাপন কৰি প্ৰতিবাদকাৰীসকলে তেওঁক ধিক্কাৰ দিয়াৰ লগতে তেওঁৰ প্ৰতিমূৰ্তিয়ো দাহ কৰে।
উল্লেখযোগ্য যে, বুধবাৰে নিশা এটা ব্যক্তিগত চেনেলৰ টক শ্ব’ত বিধায়ক গৰাকীয়ে আজান পীৰক এ আই ইউ ডি এফৰ প্ৰধান বদৰুদ্দিন আজমলৰ লগত তুলনা কৰাৰ লগতে তেওঁৰ অমৰ সৃষ্টি জিকিৰ আৰু জাৰিকলমূহ সাধাৰণ গান বুলি কৈছিল।
তেওঁৰ এই মন্তব্যত গৰিয়া-মৰিয়া দেশী জাতীয় পৰিষদৰ নেতৃত্বৰ লগতে পুৰণিগুদামৰ স্থানীয় লোকসকল ক্ষুব্ধ হৈ উঠে।
ইফালে আজান পীৰৰ অমূল্য তজবী ডাল উত্তৰাধিকাৰী সূত্ৰে বছৰ-বছৰ ধৰি সংৰক্ষণ কৰি ৰখা পুৰণিগুদামৰ মাজগাঁওস্থিত চৈয়দ মুজিৰুল হুছেইনো বিধায়ক গৰাকীৰ মন্তব্যৰ তীব্ৰ বিৰোধিতা কৰে।
প্ৰতিবাদকাৰীসকলে বিধায়ক শিলাদিত্যক অসমৰ ইতিহাস অধ্যয়ন কৰিবলৈ আহ্বান জনোৱাৰ লগতে আজান পীৰৰ ওপৰত পুনৰ বিৰূপ মন্তব্য কৰিলে তেওঁৰ বিৰুদ্ধে জংগী আন্দোলন গঢ়ি তোলাৰ হুংকাৰ দিয়ে।