বিভিন্ন প্ৰান্তত সমূহীয়া নামাজেৰে ৰাজ্যত পবিত্ৰ ঈদ-উদ্-জোহা পালন

বিভিন্ন প্ৰান্তত সমূহীয়া নামাজেৰে ৰাজ্যৰ ইচলাম ধৰ্মাৱলম্বী লোকসকলে আজি পবিত্ৰ ঈদ-উদ্-জোহা পালন কৰিছে। সমগ্ৰ বিশ্বৰ লগতে আজি অসমৰো ইচলাম ধৰ্মৰ লোকসকলে ঈদ-উদ-জোহা উপলক্ষে শান্তি-সমৃদ্ধিৰ অৰ্থে আল্লাহৰ দোৱা বিচাৰি প্ৰাৰ্থনা জনায়।

গুৱাহাটী মহানগৰীৰো বিভিন্ন ঠাইৰ ঈদগাহ, মছজিদত অগণন লোকক পুৱাৰ সমূহীয়া নামাজত ভাগ লোৱা দেখা গ’ল।

মহানগৰীৰ মাছখোৱাস্থিত ঐতিহ্যমণ্ডিত ঈদগাহ ময়দানত আজি পুৱা যথেষ্ট সংখ্যক ভক্তৰ ভিৰ পৰিলক্ষিত হয়। শিশুৰ পৰা বৃদ্ধলৈ মহানগৰীৰ বিভিন্ন প্ৰান্তৰ ভক্তসকলে এই স্থানত সমূহীয়া নামাজত অংশ লোৱাৰ উপৰি ইজনে সিজনক ঈদৰ শুভেচ্ছা জনোৱাৰ লগতে মংগল কামনা কৰে।

এই ঈদগাহ ময়দানৰ পৰাই উপস্থিতসকলে কেৰালাৰ বান বিভীষিকাত নিহতসকলৰ আত্মাৰ সদগতি কামনা কৰাৰ লগতে পৰিস্থিতি সুস্থিৰ হোৱাৰ বাবে ঈশ্বৰৰ ওচৰত দোৱা কৰে। লগতে সন্ত্ৰাস দূৰ কৰি বিশ্বত শান্তি বিৰাজ কৰাৰ বাবেও কামনা কৰে।

সমান্তৰালভাৱে আমবাৰীৰ বুঢ়া জামে মছজিদতো সহস্ৰাধিক লোকে ঈদৰ সমূহীয়া নামাজত ভাগ লয়। নামাজৰ অন্তত বুঢ়া জামে মছজিদ কমিটীৰ তৰফৰ পৰা ৰাজ্যৰ সকলো ধৰ্মৰ লোককে শান্তি-সম্প্ৰীতি আৰু ভাতৃত্ববোধ বৰ্তাই ৰাখি বৃহত্তৰ অসমীয়া জাতিক আগুৱাই নিবৰলৈ আহ্বান জনায়।

লগতে এন আৰ চিৰ প্ৰসংগ উত্থাপন কৰি একাংশ বহিৰাগত অপশক্তিৰ প্ৰৰোচনাত যাতে অসমৰ শান্তি বিঘ্নিত নহয় তাৰ বাবে সকলোকে সজাগ হৈ থাকিবলৈ আহ্বান জনায়।