যোৰহাটত ইছলামধর্মী লোকসকলে উলহ মালহৰে উদযাপন কৰিছে ঈদ, কাকজানতো সমূহীয়া নামাজ

মাহ জোৰা পবিত্ৰ ৰমজানৰ ৰোজাৰ অন্তত আজি সমগ্ৰ দেশৰ লগতে যোৰহাটতো ইছলামধৰ্মী লোকসকলে উলহ মালহেৰে উদযাপন কৰিছে পবিত্ৰ ইদুল ফিটৰ। ঈদ উপলক্ষে যোৰহাট নগৰৰ বিভিন্ন মছজিদসমূহ সজাই পৰাই তোলা দেখা গৈছে।

যোৰহাটৰ ঈদগাহ ময়দানত প্ৰতিকূল বতৰকো নেওচি লোকসকলে ঈদৰ নামাজৰ বাবে ঈদগাহলৈ অহা দেখা যায়।

উল্লেখ্য যে ক’ভিডৰ বাবে বিগত দুটা বছৰে এই ঈদগাহত ঈদৰ নামাজ হোৱা নাছিল। এইবাৰ ক’ভিডৰ কোনো নীতি-নিয়ম প্ৰযোজ্য নথকাৰ বাবে নামাজৰ বাবে  উৎসাহেৰে ওলাই আহে ইছলামধৰ্মী লোকসকল।  ঈদৰ নামাজত আজি অসমৰ শান্তি সম্প্ৰীতিৰ লগতে বিশ্ব শান্তিৰ বাবেও দোৱা-প্ৰাৰ্থনা কৰে ।

ইপিনে, অন্যান্য স্থানৰ লগতে যোৰহাট জিলাৰ টীয়কৰ কাকজানতো কাকজান ৰাজহুৱা ঈদগাহ প্ৰাংগণত ঈদৰ নমাজ সমূহীয়াকৈ অনুষ্ঠিত হয়।

উক্ত ৰাজহুৱা নামজৰ ইমামতি কৰে বনগাঁৱৰ জামাতৰ ইমাম মৌলানা হাফিজ নৰুল হকে।

উল্লেখ্য যে শতবৰ্ষ গৰকা এই ঈদগাহত জাতি ধৰ্ম বৰ্ণ নিৰ্বিশেষে সমূহ ৰাইজে অংশগ্ৰহণ কৰি ঈদৰ এই পবিত্ৰ ক্ষণত বিশ্ব শান্তিৰ বাবে নেদেখাজনৰ চৰণত সেৱা জনাইছে।