অব্যাহত শক্তি বিভাগৰ চূড়ান্ত গাফিলতি; নলবাৰীত স্কুলীয়া ছাত্ৰীৰ চাইকেলৰ ওপৰত বাগৰি পৰিল বিদ্যুতৰ খুঁটা

ৰাজ্যৰ শক্তি বিভাগৰ গাফিলতিৰ ধাৰা অব্যাত আছে। বুধবাৰে বিশ্বনাথ চাৰিআলিৰ মাজমজিয়াত বিদ্যুৎস্পৃষ্ট হৈ ৰবীন দাস নামৰ অসম শক্তি বিতৰণ কোম্পানী লিমিটেডৰ এগৰাকী ঠিকাভিত্তিক কৰ্মচাৰী বৈদ্যুতিক তাঁৰত জ্বলি জ্বলি মৃত্যু হোৱাৰ শোকাৱহ ঘটনাৰ পাছত একেদিনাই নলবাৰী জিলাৰ বাঁহজানীৰ মিলনবজাৰত বিদ্যুতৰ তাঁৰ পৰিবাহী খুঁটা এগৰাকী স্কুলীয়া ছাত্ৰীৰ চাইকেলত বাগৰি পৰে।

ঘটনাৰ বিৱৰণী অনুসৰি গোপালথান পলিটেকনিক ইনষ্টিটিউট হাইস্কুলৰ ছাত্ৰী ছয়নিকা তালুকদাৰে বিদ্যালয়লৈ ঘৰৰ পৰা চাইকেলেৰে পৰীক্ষা দিবলৈ গৈ থকা সময়তে বাটত হঠাৎ ছাত্ৰীগৰাকীৰ চাইকেলৰ ওপৰত বিদ্যুতৰ তাঁৰ পৰিবাহী খুঁটা বাগৰি পৰে।

উল্লেখযোগ্য যে, আকস্মিক দুৰ্ঘটনাটোৰ ফলত ছাত্ৰীগৰাকীৰ কথমপি প্ৰাণ ৰক্ষা পৰে যদিও তেওঁৰ চাইকেলখনৰ ওপৰত গধুৰ খুঁটা বাগৰি পৰাৰ ফলত ক্ষতিসাধন হয়।

আনহাতে, বিদ্যু বিভাগৰ গাফিলতিৰ বাবে সংঘটিত হোৱা এনে ভয়াবহ ঘটনাক লৈ অঞ্চলটোত তীব্ৰ চাঞ্চল্যৰ  সৃষ্টি হয় উত্তেজিত ৰাইজে শীঘ্ৰে শক্তি বিভাগক ৰাইজৰ নিৰাপত্তা সুনিশ্চিত কৰাৰ বাবে দাবী জনায়।