নগাঁৱত চিকিৎসালয় মুকলি কৰিবলৈ আহি ক্ষমা খুজিব লগা হ’ল ৰাজেন-পীযুষে
ৰাজ্যৰ স্বাস্থ্য আৰু পৰিয়াল কল্যাণ বিভাগৰ ৰাজ্যিক মন্ত্ৰী পীযুষ হাজৰিকাই দেওবাৰে নগাঁও সদৰ সমষ্টিৰ অন্তৰ্গত পাখিমৰীয়া মৌজাৰ উজৰা গাঁৱত উজৰাগাঁও আদৰ্শ চিকিৎসালয়ৰ শুভ উদ্বোধন কৰে।
কেন্দ্ৰীয় চৰকাৰৰ ৰে’ল ৰাজ্য মন্ত্ৰী ৰাজেন গোঁহাই আৰু নগাঁও সদৰ সমষ্টিৰ বিধায়ক ৰূপক শৰ্মাৰ উপস্থিতিত চিকিৎসালয়খন উদ্বোধন কৰে যদিও এই উদ্বোধনী অনুষ্ঠানৰ প্ৰাক মুহূৰ্তত চিকিৎসালয়খনৰ সন্মুখত স্থানীয় ৰাইজৰ অনাহুত পৰিস্থতিৰ সন্মুখীন হ’ব লগা হয়।
আনকি স্বাস্থ্য আৰু পৰিয়াল কল্যাণ বিভাগৰ ৰাজ্যিক মন্ত্ৰী পীযুষ হাজৰিকা আৰু কেন্দ্ৰীয় ৰেল ৰাজ্য মন্ত্ৰী ৰাজেন গোহাঁয়ে স্থানীয় ৰাইজক হাতযোৰ কৰি ক্ষমা প্ৰাৰ্থনা বিচাৰিবলৈ বাধ্য হয়।
উল্লেখ্য যে অসম গণ পৰিষদ দলৰ প্ৰথমটো তথা ১৯৮৫ চনৰ শাসন কালতে তদানীন্তন মুখ্যমন্ত্ৰী প্ৰফুল্ল কুমাৰ মহন্তই উজৰাগাঁৱত এখন চিকিৎসালয়ৰ আধাৰশিলা স্থাপন কৰিছিল। উজৰাগাঁৱৰ ১৪ টা পৰিয়ালে দান কৰা মাটিৰ পৰিবৰ্তে চিকিৎসালয়খনত একোটাকৈ চাকৰি দিয়াৰ প্ৰতিশ্ৰুতি দিছিল তেতিয়াৰ চৰকাৰে।কিন্তু দুবাৰকৈ শাসনভাৰ লাভ কৰিও প্ৰফুল্ল কুমাৰ মহন্ত নেতৃত্বাধীন চৰকাৰখনে চিকিৎসালয়খন নিৰ্মাণ কৰি উলিয়াব নোৱাৰিলে।
বিগত কংগ্ৰেছ চৰকাৰৰ শেষৰটো কাৰ্যকালত নগাঁও সদৰ সমষ্টিৰ প্ৰাক্তন বিধায়ক ডাঃ দুৰ্ল্লভ চমুৱাৰ জৰিয়তে স্বাস্থ্য মন্ত্ৰী ড০ হিমন্ত বিশ্ব শৰ্মাই চিকিৎসালয়খনৰ নিৰ্মাণ কাৰ্যৰ শুভাৰম্ভ কৰাৰ পিছত সেই চৰকাৰৰ কাৰ্যকালতে নিৰ্মাণ সম্পূৰ্ণ কৰি তোলে। কিন্তু পৰিতাপৰ বিষয় যে কংগ্ৰেছ চৰকাৰে চিকিৎসালয়খন ৰাইজৰ বাবে মুকলি কৰিব নোৱাৰিলে।
বিগত প্ৰায় ৪ বছৰ কাল নিৰ্মাণ সম্পূৰ্ণ হৈ পৰিত্যক্ত হৈ থকা চিকিৎসালয়খন দেওবাৰে মুকলি কৰিবলৈ আহি স্বাস্থ্য আৰু পৰিয়াল কল্যাণ বিভাগৰ ৰাজ্যিক মন্ত্ৰী পীযুষ হাজৰিকাই স্থানীয় এই ১৪ টা পৰিয়ালৰ প্ৰতিবাদৰ সন্মুখীন হয়। আনকি এই পৰিয়াল কেইটাই চিকিৎসালয়খনৰ সন্মুখত ”উজৰাগাঁও আদৰ্শ চিকিৎসালয়ৰ ভূমি দাতা পৰিয়ালৰ সদস্যক প্ৰতিশ্ৰুতি অনুসৰি চৰকাৰে চাকৰি নিদিয়াৰ প্ৰতিবাদত তলাবন্ধ কাৰ্যসূচী” শীৰ্ষক বেনাৰ আঁৰি প্ৰতিবাদ কৰে।
ইয়াৰ পিছত অসমৰ স্বাস্থ্য আৰু পৰিয়াল কল্যাণ বিভাগৰ ৰাজ্যিক মন্ত্ৰী পীযুষ হাজৰিকা আৰু কেন্দ্ৰীয় ৰে’ল ৰাজ্যমন্ত্ৰী ৰাজেন গোহাঁয়ে এই পৰিয়ালকেইটাৰ লগতে স্থানীয় ৰাইজক হাতযোৰ কৰি ক্ষমা খুজি চিকিৎসালয়খন মুকলি কৰে। চিকিৎসালয়খন মুকলি কৰি ৰাজহুৱাভাৱে এই ১৪ টা পৰিয়ালক সংস্থাপন দিয়াৰ ব্যৱস্থা কৰিব বুলি উল্লেখ কৰি মাটিখিনিৰো উচিত মূল্য চৰকাৰৰ পৰা দিয়া হ’ব বুলি ঘোষণা কৰে।
আনহাতে, এই ঘটনাৰ সন্দৰ্ভত সাংবাদিকে সোধা প্ৰশ্নৰ উত্তৰত মন্ত্ৰী হাজৰিকাই কয়,”ৰাইজৰ ক্ষোভ বুলি নাই, ক্ষোভ মানে ৰাইজে বেয়াকৈ কোৱা নাই।‘’ কেন্দ্ৰীয় ৰে’ল ৰাজ্যমন্ত্ৰী ৰাজেন গোহাঁয়ে ভাষণ প্ৰসংগত সমগ্ৰ ঘটনা সম্পৰ্কত মত ব্যক্ত কৰি কয় যে আচলতে চিকিৎসালয়খন যে মুকলি কৰিব পৰা হ’ব তাৰ কোনো ধাৰণাই কৰিব পৰা নাছিলো।
ইপিনে দেওবাৰেই নগাঁও সদৰ সমষ্টিত ২০ কোটি টকা ব্যয় সাপেক্ষে গড়কাপ্তানি বিভাগ (গ্ৰাম্য পথ সংমণ্ডল)ৰ দ্বাৰা নিৰ্মাণ হ’বলগীয়া মুঠ ৩৬ টা পথৰ আধাৰশিলা একেদিনাই স্থাপন কৰে নগাঁও সদৰ বিধানসভা সমষ্টিৰ বিধায়ক ৰূপক শৰ্মাই। এই ৰাস্তাসমূহৰ কাম অহা তিনি মাহৰ ভিতৰত সম্পূৰ্ণ হৈ উঠিব বুলি বিধায়ক শৰ্মাই প্ৰতিশ্ৰুতি প্ৰদান কৰে।