নিজৰ কামেৰে লাজহে কিনিলে শিক্ষা মন্ত্ৰী সিদ্ধাৰ্থ ভট্টাচাৰ্য্যই : তৰ্জন-গৰ্জনেৰে নিলম্বন কৰা কৰ্মচাৰীৰ নিলম্বন প্ৰত্যাহাৰ চৰকাৰৰ

সামান্য দোষতে শিক্ষা মন্ত্ৰীয়ে অপমান কৰি নিলম্বন কৰা সচিবালয়ৰ কৰ্মচাৰী তথা প্ৰাথমিক শিক্ষা বিভাগৰ জ্যেষ্ঠ প্ৰশাসনিক সহায়ক চন্দন কাকতীৰ নিলম্বন অৱশেষত প্ৰত্যাহাৰ কৰিবলৈ বাধ্য হ’ল চৰকাৰ। সচিবালয় সেৱাসন্থাৰ হেঁচা আৰু মুখ্য মন্ত্ৰীৰ হস্তক্ষেপত ৪ ছেপ্তেম্বৰত সচিবালয় প্ৰশাসন বিভাগে এই নিলম্বন প্ৰত্যাহাৰ কৰে।

ফলত সচিবালয় সেৱা সন্থাই চন্দন কাকতীৰ নিলম্বন প্ৰত্যাহাৰৰ দাবীত অহা ৬ ছেপ্তেম্বৰত ক’লা বেজ পৰিধান কৰি প্ৰতিবাদৰ কাৰ্য্যসূচী লৈছিল যদিও সেয়া বাতিল কৰিলে।

উল্লেখযোগ্য যে ১২ জুলাইত শিক্ষা মন্ত্ৰী সিদ্ধাৰ্থ ভট্টাচাৰ্য্যই কৰ্মচাৰীজনক সামান্য দোষতে নিজৰ কক্ষলৈ মানি নি অপদস্থ কৰিছিল আৰু নিলম্বনৰ নিৰ্দেশ দিছিল।

ইয়াৰ বিৰুদ্ধে সমগ্ৰ সচিবালয় কৰ্মচাৰী শিক্ষা মন্ত্ৰীজনৰ বিৰুদ্ধে জাঙুৰ খাই উঠিছিল। সচিবালয় কৰ্মচাৰীসকলৰ সংগঠন সচিবালয় সেৱা সন্থাই প্ৰতিবাদ কৰাত মুখ্য মন্ত্ৰী সোণোৱালে বিষয়টো তদন্ত কৰোৱাৰ আশ্বাস দিয়াৰ লগতে ৰাজহ বিভাগৰ প্ৰধান সচিব ৰাজেশ প্ৰসাদক তদন্তৰ নিৰ্দেশো দিছিল।

অৱশেষত সেইমতে ৪ ছেপ্তেম্বৰত কৰ্মচাৰীজনৰ নিলম্বন প্ৰত্যাহাৰ কৰা হয়। কৰ্মচাৰীৰ সৈতে অযথা সংঘাতত লিপ্ত হোৱা শিক্ষা মন্ত্ৰী সিদ্ধাৰ্থ ভট্টাচাৰ্য্যই এতিয়া কি প্ৰতিক্ৰিয়া কৰে সেয়া চাব লগীয়া হ’ব। মন্ত্ৰীজনৰ বিৰুদ্ধে সামান্য কথাতে মানুহক দুৰ্ব্যৱহাৰ কৰাৰ অভিযোগ সততে উঠা দেখা যায়।