টেনিছৰ নতুন চাঞ্চল্য! মাজনিশা ইতিহাস ৰচি ইউ এছ অ’পেনৰ খিতাপ জয় ব্ৰিটিছ তৰুণী এমা ৰাডুকানুৰ
ইউ এছ অ’পেনত দুগৰাকী তৰুণীৰ মাজত হোৱা ফাইনেলত মাজনিশা ইতিহাস ৰচি খিতাপ জয় কৰিলে ১৮ বছৰীয়া ব্ৰিটিছ তৰুণী এমা ৰাডুকানুৱে।
দৰ্শকৰ চকু নিৱদ্ধ ফ্লাছিং মিডোৰ ফাইনেল খেলখনত কানাডাৰ লেইলা ফাৰ্ণাণ্ডেজক ষ্টেইট ছেটত পৰাজিত কৰি ঐতিহাসিক বিজয় সাৱ্যস্ত কৰে এমা ৰাডুকানুৱে।
যুক্তৰাষ্ট্ৰ অ’পেনৰ পূৰ্বে চলিত বছৰতে উইম্বলডনত প্ৰথমবাৰ গ্ৰেণ্ডশ্লামত ভূমুকি মাৰিছিল এমাই। ঘাঁহৰ কোৰ্টত আৰম্ভণি ভালেই ঘটাইছিল যদিও চতুৰ্থ ৰাউণ্ডত শ্বাসকষ্টৰ সমস্যাৰ বাবে দুৰ্ভাগ্যজনকভাৱে আঁতৰি যাবলগীয়া হৈছিল ব্ৰিটিছ তৰুণীগৰাকী।
কিন্তু দুমাহ পাছতেই দুৰ্দান্ত প্ৰত্যাৱৰ্তনেৰে ইউ এছ অ’পেনৰ খিতাপ জয় কৰি এইদৰে চমক সৃষ্টি কৰাৰ বিষয়ে হয়তো কোনেও চিন্তাই কৰিব পৰা নাছিল।
মাত্ৰ তিনি বছৰ পূৰ্বে উইম্বলডন জুনিয়ৰৰ দ্বিতীয় ৰাউণ্ডত মুখামুখি হৈছিল এমা আৰু লেইলা। সেইখন মেচৰ দৰেই নিজৰ প্ৰথম গ্ৰেণ্ডশ্লামৰ স্বপ্নৰে কোৰ্টত নমা দুই তৰুণীৰ যুঁজতো কালি শেষ হাঁহি মাৰিলে এমাই।
লেইলাৰ বিৰুদ্ধে এমাই ৬-৪, ৬-৩ৰ পোনপোটীয়া ব্যৱধানত বিজয় সাৱ্যস্ত কৰে।
টুৰ্মামেন্টখনত নিজৰ আধিপত্যৰ ধাৰা অব্যাহত ৰাখি এটাও ছেট নেহেৰুৱাকৈ ফ্লাছিং মিডোত নিজৰ দহ নম্বৰ মেচ জিকি খিতাপ অৰ্জন কৰে এমাই।
আৰম্ভণিতে ইউ এছ অ’পেনৰ ১৫০ নম্বৰ মহিলা ছিংগল টেনিছ তাৰকা হিচাপে কোৰ্টত নমা এমাই নিজৰ প্ৰথম গ্ৰেণ্ডশ্লাম জয় কৰি ২৩ নম্বৰ টেনিছ তাৰকা হিচাপে কোৰ্ট এৰিলে।
স্বাভাৱিকতে এতিয়া মহিলা টেনিছৰ নতুন চাঞ্চল্য হিচাপে চৰ্চা লাভ কৰাৰ পথত এমা ৰাডুকানু।