কলিয়াবৰত কেঁকোসাপসহ ৭জন সৰবৰাহকাৰী আটক

আজি পুৱা কলিয়াবৰ আৰু জখলাবন্ধা আৰক্ষীয়ে এক যৌথ অভিযান চলাই কেঁকোসাপসহ ৭ গৰাকীকৈ চোৰাং সৰবৰাহকাৰীক আটক কৰিবলৈ সক্ষম হয়। উক্ত অভিযানত আৰক্ষীয়ে কেঁকোসাপ বেপাৰী কেইজনে ব্যৱহাৰ কৰা দুখন বাহনো জব্দ কৰে।

জানিব পৰা মতে তিনিচুকীয়াৰ পৰা এ এছ ২৩ য়ু ৯৫৫৫ আৰু এ এছ ২৩ টি ৯১২৭ নম্বৰৰ গাড়ী দুখনৰে অহা সাতজনীয়া দলটো কলিয়াবৰৰ চিকনি অঞ্চলৰ পৰা কেঁকোসাপ ক্ৰয় কৰি থকা অৱস্থাতে আৰক্ষীয়ে তেওঁলোকক হাতে-লোটে ধৰা পেলায়।

আৰক্ষীৰ এক সূত্ৰই জনোৱা মতে ধৃত লোককেইজনৰ পৰা আৰক্ষীয়ে এটা কেঁকোসাপ উদ্ধাৰ কৰাৰ লগতে বহু আপত্তিজনক সা-সামগ্ৰী জব্দ কৰে।

আটকাধীন ব্যক্তি কেইজনক সঞ্জীৱ দাস, গহীন বুঢ়াগোঁহাই, প্ৰবীন টুটি, ৰিতুৰাজ অভয়পুৰীয়া, ডম্বৰু মহন, ফণীধৰ দত্ত আৰু প্ৰবীন বুঢ়াগোঁহাই বুলি চিনাক্ত কৰা হৈছে। সম্প্ৰতি তেওঁলোকক অধিক তথ্যৰ বাবে জখলাবন্ধা আৰক্ষী নিৱেশত আৰক্ষীয়ে সোধা-পোচা চলাই আছে।