বুঢ়ীদিহিঙৰ গৰাখহনীয়াৰ সমাধান, বাট-পথ নিৰ্মাণৰ দাবীত এ জে ৱাই চি পিৰ মানৱ শৃংখল

অসম জাতীয়তাবাদী যুৱ ছাত্ৰ পৰিষদৰ তিনিচুকীয়া জিলা সমিতি আৰু টিৰাপ জাগুন আঞ্চলিক সমিতিয়ে বুধবাৰে এক নং টকলং গাঁৱত মানৱ শৃংখল কাৰ্যসূচী ৰূপায়ণ কৰি বুঢ়ীদিহিং নৈৰ গৰাখহনীয়াৰ স্থায়ী সমাধান কৰাৰ লগতে মধুপুৰ, নিম গাওঁ, টকলং, সৰ্বোদয়, কুমচাই, ঘৰফলীয়া, পাংচোন গাওঁকে ধৰি সকলো জৰাজীৰ্ণ বাট-পথ নিৰ্মাণ কৰাৰ দাবী জনায়।

সংগঠনটোৱে অভিযোগ কৰে যে অঞ্চলসমূহত বান-গৰাখহনীয়াৰ ফলত বহুজনৰ খেতিপথাৰৰ লগতে বহু সম্পত্তি বিনষ্ট হৈ আহিছে।

তাৰোপৰি জৰাজীৰ্ণ বাট-পথৰ ফলত এম্বুলেঞ্চ এখনো সেই পথবিলাকত সোমাব নোৱাৰা পৰিস্থিতিৰ সৃষ্টি হয় বুলি উল্লেখ কৰি আগন্তুক বিধান সভা নিৰ্বাচনৰ আগতে সেয়া সমাধান কৰিবলৈ দাবী জনাইছে।

মাৰ্ঘেৰিটা বিধান সভা সমষ্টিৰ অন্তৰ্গত টিৰাপ আৰু মাকুম মৌজাৰ একাংশ গাঁ‌ৱত অব্যাহত থকা বুঢ়ীদিহিং নদীৰ ভয়ংকৰ গৰাখহনীয়াই নৈপৰীয়াবাসীলৈ দুৰ্যোগ নমাই আনিছে।

তিনিচুকীয়া জিলাৰ ১২৪নং মাৰ্ঘেৰিটা বিধানসভা সমষ্টিৰ অন্যতম এক জ্বলন্ত সমস্যা হৈছে গৰাখহনীয়া সমস্যা।

পোন্ধৰ বছৰীয়া কংগ্ৰেছৰ শাসন কালত মাৰ্ঘেৰিটা সমষ্টিবাসীয়ে জনপ্ৰতিনিধিৰ পৰা পালে মাত্ৰ প্ৰতিশ্ৰুতি আৰু প্ৰতিশ্ৰুতি।

মাত্ৰ নিৰ্বাচনৰ সময়ত সমষ্টিবাসীলৈ মনত পৰা মাৰ্ঘেৰিটাৰ তদানীন্তন কংগ্ৰেছ বিধায়ক তথা মন্ত্ৰী প্ৰদ্যুৎ বৰদলৈয়ে মাৰ্ঘেৰিটাৰ উন্নয়ন মাত্ৰ প্ৰতিশ্ৰুতিতে সীমাবদ্ধ ৰাখি বুঢ়ীদিহিং নদীৰ খহনীয়াৰ দৰে জ্বলন্ত সমস্যা এটাক সমাধানটো নকৰিলেই আৰু সমাধান কৰাৰ ক্ষেত্ৰত কোনো আগ্ৰহেই নেদেখুৱালে বুলি অসম জাতীয়তাবাদী যুৱ-ছাত্ৰ পৰিষদৰ টিৰাপ-জাগুন আঞ্চলিক সমিতিয়ে অভিযোগ কৰিছে।

আনহাতে বিজেপি দলৰ ডিব্ৰুগড় সংসদীয় সমষ্টিৰ সাংসদ ৰামেশ্বৰ তেলীয়েও সাংসদৰ দায়িত্বভাৰ লৈয়েই মাৰ্ঘেৰিটা সমষ্টিটোৰ স্পৰ্শকাতৰ জ্বলন্ত সমস্যাসমূহ সমাধান কৰাৰ ক্ষেত্ৰত সমষ্টিবাসীক প্ৰতিশ্ৰুতি প্ৰদান কৰিছিল।

কিন্তু তেৱোঁ আজিপৰ্যন্ত কিন্ত মাটি-ভেটি সুৰক্ষাৰ ভাবুকিস্বৰূপ গৰাখহনীয়া সমস্যাটো সমাধানৰ ক্ষেত্ৰত কোনো গুৰুত্বই প্ৰদান নকৰিলে বুলি অভিযোগ তুলিছে যুৱ ছাত্ৰ পৰিষদে।

ইফালে বিভিন্ন সময়ত অঞ্চলবাসীয়ে বহুবাৰ মাৰ্ঘেৰিটাৰ বিধায়ক ভাস্কৰ শৰ্মাক অঞ্চলটোৰ স্পৰ্শকাতৰ সমস্যাসমূহ সমাধান কৰিবৰ কাৰণে দাবী জনাই আহিছে যদিও বিধায়ক গৰাকীয়ে কোনো গুৰুত্ব প্ৰদান নকৰাৰ অভিযোগ তুলিছে সংগঠনটোৰ জিলা সমিতিৰ কৰ্মকৰ্তাসকলে।