‘৬ নং দফা কমিটিৰ প্ৰতিবেদনখনো NRCৰ দৰে পেলনীয়া কাগজ হ’ব’; তৰুণ গগৈ

বিজেপি বিধায়ক সাংসদৰ উচটনিমুলক বক্তব্যৰ বাবে উত্তৰ পূব দিল্লীত এনে ঘটনা হৈছে। পুলিচ চৰকাৰ সকলো নিষ্ক্ৰিয়। আজি দিছপুৰৰ মন্ত্ৰী আৱাসত এক সংবাদ মেল সম্বোধন কৰি এইদৰে কয় প্ৰাক্তন মুখ্যমন্ত্ৰী তৰুণ গগৈয়ে।

সংবদমেলত তেওঁ আৰু কয় যে এনে সাম্প্ৰদায়িক ঘটনা পূৰ্বে ভাৰতবৰ্ষত হোৱা নাছিল, পূৰ্বে হৈছিল যদিও এনেধৰণে হোৱা নাছিল। ন্যায়িক ব্যৱস্থাৰ ওপৰত হেঁচা পৰিছে, যাৰ বাবে উচ্চতম ন্যায়ালয়ৰ চাৰিজন ন্যায়াধীশে সংবাদমেল সম্বোধন কৰিবলগীয়া পৰিস্থিতি হৈছে।

চৰকাৰে হাংগামা হোৱাটো বিচাৰিছ। ডোনাল্ড ট্ৰাম্পৰ লগততো মোদী অনবৰতে থকা নাছিল। যদি তেওঁ ৰাতিলৈকে কামেই কৰি থাকে তেন্তে তেওঁৰ ঘৰৰ ওচৰতে এনে ঘটনা হৈ থকাৰ পাছতো কিয় গুৰুত্বপূৰ্ণ ভূমিকা ল’ব নোৱাৰিলে বুলি প্ৰশ্ন কৰে।

কালিহে দুভালক পঠাবলৈ সময় পালে। ট্ৰাম্পক পাই মোদী ক’ব নোৱাৰা হৈ পৰিছিল, ইফালে জুই জ্বলি আছিল। ট্ৰাম্প অহাৰ লগে লগে নিজৰ মানুহখিনিক পাহৰি গ’ল। ছোনীয়া গান্ধীয়ে পদত্যাগ কৰিব কোৱাৰ পাছতহে মোদীয়ে টুইট কৰিবলৈ সময় পালে।

মানুহ মৰি আছে আৰু এওঁলোক শুই আছে। ট্ৰাম্পে মোদীক সঁচাই শক্তিশালী বুলি কৈছে নে ইতিকিং কৰিছে মোৰ সন্দেহ হৈছে বুলিও কটাক্ষ কৰে প্ৰাক্তন মুখ্যমন্ত্ৰীগৰাকীয়ে।

মোদীয়ে ইমৰাণ খানকো ভাল পায়, ট্ৰাম্পকো ভাল পায় আনফালে আকৌ সন্ত্ৰাসবাদক বেয়া পায়।

কা আনি গণতন্ত্ৰ এতিয়া বিপদাপন্ন কৰিলে। অসমতো চৰকাৰখনে য’ত গুৰুত্ব দিব লাগিছিল তাত গুৰুত্ব দিয়া নাই বুলি মন্তব্য কৰে তেওঁ।

৬ নং দফাৰ সন্দৰ্ভত তেওঁ কয়, ৬ নং দফা কমিটিক কেন্দ্ৰীয় চৰকাৰে আৱমাননা কৰিলে। প্ৰতিবেদন অতি সোনকালে ৰাজহুৱা কৰিব লাগে, এইখন গোপনীয় কৰি ৰাখিবলৈ কি আছে? যদি কাৰ্যকৰী কৰিব বিচাৰিছে তেন্তে সোনকালে কওঁক তাৰ আগত প্ৰতিবেদন ৰাজহুৱা কৰক। এইখনো NRC ৰ দৰে পেলনীয়া কাগজ হ’ব। অসমৰ মানুহক পুনৰ ঠগিব বিচাৰিছে।

ৰাজ্যসভাৰ নিৰ্বাচন সংক্ৰান্তত তেওঁ কয়, ৰাজ্যসভা আসনৰ বাবে বৰ্ষাৰণীৰো নাম আহিব পাৰে, জুবিনো আহিব পাৰে, অখিলৰো কথা আহি আছে,  অৰূপ বৰবৰুৱা হ’ব পাৰে অথবা অজিত ভূঞাই হওঁক। ৰাজনৈতিক দলৰ বাহিৰৰ হোৱাটো ভাল। কিয়নো তেওঁলোকৰ বিৰুদ্ধে ক’বলৈ একো নাথাকে। নাম কেইবাজনৰো ওলাল গতিকে বাচনি কৰোঁতে অলপ দিগদাৰ হ’ব পাৰে। এওঁলোকৰ ভিতৰত কাৰোবাক দিলে মোৰ আপত্তি নাথাকিব,  মই এওঁলোকৰ ফেভাৰত আছোঁ।

নতুন ৰাজনৈতিক দল হওক,  প্ৰতিযোগিতা হ’ব লাগে। বিভাজন কৰি লাভ নাই, বিৰোধী দল গঠন কৰিলে এটাই কৰক, শক্তিশালীকৈ কৰক। এটা শক্তিশালী পাৰ্টি হোৱা ভাল, সেইটো সাম্প্ৰদায়িক বিজেপিৰ বিৰুদ্ধে হ’ব লাগে, তেতিয়া সমৰ্থন জনাম বুলি ৰাজ্যত চৰ্চিত হৈ নতুন ৰাজনৈতিক দল গঠন সন্দৰ্ভত কয় তৰুণ গগৈয়ে।