আল্লিয়াত ভুৱনেশ্বৰ কলিতাৰ হৈ প্ৰাক্তন মুখ্য মন্ত্ৰী তৰুণ গগৈৰ নিৰ্বাচনী প্ৰচাৰ
ৰাজ্যত দ্বিতীয় পৰ্য্যায়ৰ নিৰ্বাচনৰ প্ৰচাৰ অভিযানৰ সামৰণি পৰিবলৈ মাজত মাত্ৰ এটা দিন বাকী থকা অৱস্থাত আজি নলবাৰী জিলাৰ আল্লিয়াত মঙলদৈ সমষ্টিৰ কংগ্ৰেছ প্ৰাৰ্থী ভুৱনেশ্বৰ কলিতাৰ হৈ নিৰ্বাচনী প্ৰচাৰ চলাই প্ৰাক্তন মুখ্য মন্ত্ৰী তৰুণ গগৈয়ে।
দুপৰীয়া ১২.৩০ বজাত আল্লিয়া হৰিমন্দিৰ প্ৰাঙ্গণত অনুষ্ঠিত হোৱা বিশাল নিৰ্বাচনী সভাত অংশগ্ৰহণ কৰাৰ বাবে হেলিকপ্তাৰেৰে উপস্থিত হয় কংগ্ৰেছ নেতাগৰাকী। সভাত তৰুণ গগৈৰ লগত উপস্থিত থাকে প্ৰবীণ কংগ্ৰেছ নেতা তথা প্ৰাক্তন মন্ত্ৰী ডাঃ ভূমিধৰ বৰ্মনৰ লগতে মণ্ডল কংগ্ৰেছৰ ভালেকেইগৰাকী নেতা-কৰ্মী।
নিৰ্বাচনী সভাত অংশগ্ৰহণ কৰি তৰুণ গগৈয়ে বিজেপি আৰু নৰেন্দ্ৰ মোদীক কঠোৰ সমালোচনা কৰে। মোদীয়ে প্ৰধান মন্ত্ৰী হৈ অসম আৰু দেশৰ জনসাধাৰণক পাঁচ বছৰে মিছা কথা কলে বুলি কটাক্ষ কৰাৰ লগতে কিমানজন নিবনুৱাক তেওঁ সংস্থাপন দিলে আৰু ক’লা ধন ঘুৰাই আনিলেনে বুলিও গগৈ প্ৰশ্ন কৰে।
আনহাতে, নাগৰিকত্ব সংশোধনী বিধেয়কৰ প্ৰসংগ উত্থাপন কৰি বিজেপিয়ে বাংলাদেশী খেদিব নোৱাৰি এতিয়া নতুনকৈ আনিবহে চেষ্টা কৰিছে বুলি মন্তব্য কৰে।
কংগ্ৰেছ দলে ৰাহুল গান্ধীক প্ৰধান মন্ত্ৰী হিচাপে প্ৰক্ষেপ কৰাৰ প্ৰসংগত গগৈয়ে ৰাহুল গান্ধীয়ে কথা দিলে কথা ৰাখিব জানে সেই বাবে তেওঁ প্রধান মন্ত্ৰী হোৱাৰ যোগ্য বুলি কয়। তদুপৰি স্বাধীনতাৰ পৰা ভাৰত আৰু অসমৰ নিৰ্মাণত কংগ্ৰেছ দলৰ যিমান অৱদান আছে তাৰ তুলনাত বিজেপিৰ অবদান একো নাই বুলি প্ৰাক্তন মুখ্য মন্ত্ৰীগৰাকীয়ে মন্তব্য কৰে।
সভাত ভাষণ প্ৰদাণ কৰি প্ৰবীণ কংগ্ৰেছ নেতা ডাঃ ভূমিধৰ বৰ্মনে মঙলদৈ সমষ্টিৰ ৰাইজে এইবাৰ ভুৱনেশ্বৰ কলিতাক ভোট দি জয় যুক্ত কৰাব বুলি কয়। সভাত প্ৰায় পাঁচ সহস্ৰাধিক কংগ্ৰেছৰ দলীয় নেতা-কৰ্মী উপস্থিত থাকে। জেষ্ঠ কংগ্ৰেছ নেতাসকলক ওচৰৰ পৰা পাই উৎফুল্লিত হৈ পৰে কংগ্ৰেছৰ সমৰ্থকসকল।