দুই এটা বিক্ষিপ্ত ঘটনাৰ মাজেৰে মৰিগাঁৱত সামৰণি পৰিল তিৱা স্বায়ত্ত পৰিষদৰ নিৰ্বাচনৰ ভোটগ্ৰহণ

বিক্ষিপ্ত দুই এটা ঘটনা প্ৰৱাহৰ মাজেৰে মৰিগাঁৱত সামৰণি পৰিল তিৱা স্বায়ত্ত পৰিষদৰ নিৰ্বাচনৰ ভোটগ্ৰহণ।

৩৬টা সংসদীয় ১৮ সমষ্টিত অনুষ্ঠিত হোৱা নিৰ্বাচনৰ ভোটগ্ৰহণৰ মাজতে ১৭ নং ভোমোৰাগুৰি সমষ্টিত সৃষ্টি হয় অস্বত্তিকৰ পৰিবেশ।

মৰিগাঁও জিলাৰ ১৯ টা তিৱা স্বায়ত্ত পৰিষদীয় নিৰ্বাচন আজি শান্তিপূৰ্ণ ভাৱে সম্পন্ন হয় যদিও ‘নৰ্থ ইষ্ট নাও’ৰ হাতত পৰা তথ্য অনুযায়ী কেইবা ঠাইতো কিছু বিক্ষিপ্ত ঘটনা সংঘটিত হৈছে।

আনহাতে, ১৭ নং ভোমোৰাগুৰি সমষ্টিৰ মাজগাঁও ৯ নং প্ৰাথমিক বিদ্যালয়ৰ কেন্দ্ৰতো এক উত্তপ্ত পৰিস্থিতিৰ সৃষ্টি হোৱা বুলি জানিব পৰা গৈছে।

প্ৰাপ্ত তথ্যমতে সমষ্টিটোৰ সংশ্লিষ্ট ভোট কেন্দ্ৰটোত যোৱা ২০১৫ চনৰ ভোটৰ তালিকাত অন্তৰ্ভূক্ত একাংশ ভোটাৰ এই বৰ্ষৰ তালিকাত নাম নথকাত ভোট দিবলৈ গৈ হতাশ হৈ উত্তেজিত হৈ পৰে।

ইপিনে, ২৬৩ জন ভোটাৰৰ ভোটাৰ তালিকাত নাম নথকাত পুলিং অফিচাৰ আৰু প্ৰশাসনৰ লোকক ভোটাৰসকলে কৈফয়ৎ বিচাৰে।

এনে এক  অনাহুত সময়ত শাসকীয় দলৰ লগতে আন তিনিও গৰাকী প্ৰাৰ্থীৰ সমৰ্থকে নিৰ্দলীয় প্ৰাৰ্থী এলিজা ৰাভাৰ সমৰ্থনত থকা ভোটাৰ ৰূপে বিবেচিত কৰি সংশোধিত তালিকা ব্যবহাৰত বাধা প্ৰদান কৰি এক উতপ্ত পৰিস্থিতিৰ সৃষ্টি কৰাত আৰক্ষীয়ে যেনিবা পৰিস্থিতি কিছু নিয়ন্ত্ৰণ কৰে যদিও সংশোধিত তালিকা ব্যবহাৰৰ পৰা প্ৰশাসন বিৰত থাকে।

ইয়াকে লৈ বঞ্চিত ভোটাৰ সকলে ভোট কেন্দ্ৰটোত পুনৰ ২০ ডিচেম্বৰত সংশোধিত ভোটাৰ তালিকাৰে ভোট গ্ৰহণ কৰিবলৈ জিলা নিৰ্বাচনী বিষয়াক দাবী জনাইছে।

মনকৰিবলগীয়া যে শাসকীয় দলৰে মৰিগাঁৱৰ বিধায়ক ৰমাকান্ত দেউৰীৰ গৃহ সমষ্টিতে সংঘটিত এনে ঘটনাই সৰ্বত্ৰে প্ৰতিক্ৰিয়াৰ সৃষ্টি কৰিছে।