জলসিঞ্চনৰ ৪কোটি টকা আত্মস্যাৎ কৰা গোচৰৰ মূল অভিযুক্ত অভিযন্তা সত্যৰাম কলিতাৰ আত্মসমৰ্পণ

টংলা জলসিঞ্চন বিভাগৰ অভিযন্তা সত্যৰাম কলিতাই আত্মসমৰ্পন কৰিছে। টকা আত্মস্যাৎ কৰা গোচৰত আৰক্ষীৰ গ্ৰেপ্তাৰৰ ভয়ত পলাতক অৱস্থাত আছিল অভিযুক্ত অভিযন্তাজন।

ঠিকাদাৰৰ এছ ডি মানীৰ (ছিকিউৰিটি ডিপ’জিট ধন) ৪ কোটি টকা আত্মস্যাৎ কৰা গোচৰৰ মুল অভিযুক্ত আছিল অভিযন্তা সত্যৰাম কলিতা।

অৱশেষত ওদালগুৰিৰ অতিৰিক্ত মুখ্য ন্যায়িক দণ্ডাধীশৰ আদালতত আত্মসমৰ্পণ কৰে পলাতক অভিযন্তাজনে।

উল্লেখ্য যে বিভাগটোৰ গাননিক বিষয়া প্ৰভাত কলিতাক টংলা আৰক্ষীয়ে পুৰ্বেই গুৱাহাটীৰ পৰা গ্ৰেপ্তাৰ কৰিছিল।

টংলা জলসিঞ্চন বিভাগৰ ৪কোটি ১৮লাখ টকীয়া কেলেংকাৰীত গাণনিক বিষয়া প্ৰভাত কলিতা, কাৰ্যবাহী অভিযন্তা সত্যৰাম কলিতাৰ উপৰি বিটিচিৰ চিএইচডি মৃগেন বড়োৰ বিৰুদ্ধে অভিযোগ অনা হৈছিল।

গুৱাহাটী উচ্চ ন্যায়ালয়ে যোৱা ৪ মাৰ্চত ১৭৯/২১ নং টংলা আৰক্ষী থানাত ৰুজু হোৱা গোচৰৰ অন্তৱৰ্তীকালীন জামিন নাকচ কৰিছিল।

উচ্চ ন্যায়ালয়ত জামিন নাকচ হোৱাৰ পিছতে গাণনিক বিষয়া প্ৰভাত কলিতাক আৰক্ষীয়ে আটক কৰিছিল যদিও অভিযন্তা সত্যৰাম কলিতা পলাতক হৈ আছিল।