শিশু-গৰ্ভৱতী মহিলাৰ মাজত পুষ্টিকৰ খাদ্যৰ নামত ম্যাদ উকলি যোৱা খাদ্য বিতৰণ

বাক্সা জিলাৰ তামুলপুৰ সংহত শিশু উন্নয়ন প্ৰকল্প বিষয়াৰ অধীনৰ কুমাৰীকাটাৰ কালিপুৰ আৰু গোপীনাথপুৰ অঞ্চলত অংগনৱাড়ী কেন্দ্ৰৰ জৰিয়তে শিশু আৰু গৰ্ভৱতী মহিলাৰ বাবে পুষ্টিকৰ খাদ্যৰ বিপৰীতে ম্যাদ উকলি যোৱা খাদ্যৰ পেকেট বিতৰণ কৰাৰ গুৰুতৰ অভিযোগ উত্থাপন হৈছে।

এই ভয়ংকৰ তথ্য বাক্সা জিলা ছাত্ৰ সন্থাৰ এজন বিষয় ববিয়াই পোহৰলৈ অনাৰ পাছতে অঞ্চলটোত সৃষ্টি হৈছে বিৰূপ প্ৰতিক্ৰিয়াৰ।

ইফালে বুধবাৰে কালিপুৰ আৰু গোপীনাথপুৰ অঞ্চলৰ হিতাধিকাৰ সকলে খাদ্যৰ পেকেট সমূহ সংবাদ মাধ্যমৰ সন্মুখত প্ৰদৰ্শন কৰি ক্ষোভ উজাৰে।

উল্লেখ্য যে হিতাধিকাৰীৰ মাজত বিতৰণ কৰা খাদ্যৰ পেকেট সমূহ ২০১০ চনৰ আগষ্ট মাহত পেকেটিং কৰা বুলি স্পষ্টভাৱে লিখা আছে আৰু ইয়াৰ ম্যাদ ১ বছৰৰ বাবে বুলিও উল্লেখ আছে। অৰ্থাৎ ইয়াৰ ম্যাদ ২০১১ চনৰ আগষ্ট মাহতে উকলি গৈছে।

হিতাধিকাৰী সকলে অভিযোগ আনি পেকেট সমূহ সংবাদ মাধ্যমৰ সন্মুখত প্ৰদৰ্শন কৰি কয় যে পেকেটৰ ওপৰত লিখা থকা ২০১০ চনটোৰ ওপৰত বগা ৰং সানি দি ২০১৯ বুলি কলমেৰে লিখি হিতাধিকাৰীৰ মাজত বিতৰণ কৰা হৈছে।

ইফালে এই খাদ্য খাই এগৰাকী মহিলা অসুস্থ হোৱা বুলিও সংবাদ মাধ্যমৰ আগত উল্লেখ কৰে।

এনেদৰে পুষ্টিকৰ খাদ্যৰ নামত শিশু আৰু মহিলা সকলৰ মাজত ম্যাদ উকলি যোৱা খাদ্য বিতৰণ কৰি শিশু আৰু মহিলা সকলক বিকলাংগ কৰিবলৈ চেষ্টা চলোৱাৰ অভিযোগ কৰি ইয়াৰ এক উচিত তদন্ত বিচাৰিছে হিতাধিকাৰী সকলৰ লগতে বাক্সা জিলা ছাত্ৰ সন্থাৰ শিক্ষা সম্পাদক ডুলুজিৎ দাসে।