ফোৰ্বছৰ প্ৰভাৱশালী মহিলাৰ তালিকাত কেন্দ্ৰীয় বিত্তমন্ত্ৰী নিৰ্মলা সীতাৰমণসহ তিনি ভাৰতীয়

বিশ্ব বিখ্যাত আলোচনী ফোৰ্বছে প্ৰকাশ কৰা বিশ্বৰ ১০০ গৰাকী প্ৰভাৱশালী মহিলাৰ তালিকাত স্থান লাভ কৰিবলৈ সক্ষম হৈছে ভাৰতৰ কেন্দ্ৰীয় বিত্তমন্ত্ৰী নিৰ্মলা সীতাৰমণে।

সীতাৰমণৰ উপৰি ফোৰ্বছৰ তালিকাত স্থান লাভ কৰা আন দুগৰাকী প্ৰভাৱশালী মহিলা হৈছে ক্ৰমে ৰোশনী নাদাৰ মালহোত্ৰা আৰু কিৰণ মজুমদাৰ শ্ব’।

ফোৰ্বছৰ প্ৰভাৱশালী মহিলাৰ তালিকাৰ প্ৰথম স্থানত আছে জাৰ্মানীৰ চেঞ্চেলৰ এঞ্জেলা মাৰ্কেল।ভাৰতৰ কেন্দ্ৰীয় বিত্তমন্ত্ৰী নিৰ্মলা সীতাৰমণৰ তালিকাত স্থান হৈছে ৪৭।

প্ৰভাৱশালী মহিলাৰ তালিকাত ৫৫ সংখ্যক স্থানত আছে HCL Corporationৰ মুখ্য কাৰ্যবাহী বিষয়া ৰোশনী নাদাৰ মালহোত্ৰা।মালহোত্ৰাই কোম্পানীটোৰ কেইবা হাজাৰ কোটি টকাৰ ব্যৱসায়ৰ সিদ্ধান্ত ল’ব পাৰে।

তালিকাৰ ৬৮ সংখ্যক স্থানত থকা কিৰণ মজুমদাৰ শ্ব’ক দেশৰ ‘ছেল্ফে মেড’ উদ্যোপতিসকলৰ ভিতৰত আটাইতকৈ ধনী উদ্যোগপতি হিচাবে বিবেচনা কৰা হৈছে।

কিৰণ মজুমদাৰ শ্ব’ৰ বায়োকন নামৰ ঔষধ প্ৰস্তুতকাৰী প্ৰতিষ্ঠানটো এছিয়াৰ ভিতৰতে সৰ্বৃহৎ প্ৰতিষ্ঠান।ফোৰ্বছৰ প্ৰভাৱশালী মহিলাৰ তালিকাৰ দ্বিতীয় স্থানত আছে ক্ৰিশ্চিনা লগাৰ্ডে আৰু তৃতীয় স্থানত আছে আমেৰিকাৰ সদ্য নিৰ্বাচিত ভাৰতীয় মূলৰ উপ-ৰাষ্ট্ৰপতি কমলা হেৰিছ।

উল্লেখ্য বিবিচিয়েও  অলপতে প্ৰকাশ কৰা বিশ্বৰ ১০০ গৰাকী প্ৰভাৱশালী মহিলাৰ তালিকাত  স্থান লাভ কৰিছিল ভাৰতৰ বিভিন্ন ক্ষেত্ৰৰ ৪ গৰাকী বিশিষ্ট নাৰীয়ে।

বিবিচিৰ তালিকাত স্থান লাভ কৰা ভাৰতীয় মহিলা কেইগৰাকী হৈছে ক্ৰমে শাহিনবাগত ‘কা’ বিৰোধী আন্দোলনৰ সময়ত বয়সৰ ভৰকো নেওঁচি আন্দোলনত ভাগ লোৱা ৮২ বছৰীয়া বিলকিছ বানু, তামিলনাডুৰ গায়িকা ইছাইবানি,পেৰা বেডমিণ্টন বিশ্ব চেম্পিয়ন মানসী যোশী আৰু পৰিবেশ কৰ্মী ৰিদ্ধিমা পাণ্ডে।

‘কা’ বিৰোধী আন্দোলনৰ সময়ত বিলকিছ বানুই কেৱল দেশৰে নহয়, সমগ্ৰ বিশ্বৰে সংবাদমাধ্যমৰ শিৰোনাম দখল কৰিবলৈ সক্ষম হৈছিল।

একেদৰে তামিলনাডুৰ গায়িকা ইছাইবানিয়ে নিজস্ব প্ৰতিভাৰে ৰাজ্য খনৰ সংগীতৰ জগত খনত ইমান দিনে বৰ্তি থকা পুৰুষৰ আধিপত্যৰ অৱসান ঘটাবলৈ সক্ষম হৈছে।

বাকী দুগৰাকী মহিলাই নিজ নিজ ক্ষেত্ৰেত পাৰদৰ্শিতাৰে কাৰ্য সম্পাদন কৰিবলৈ সক্ষম হৈছে।