মন্ত্ৰী হিমন্ত বিশ্ব শৰ্মাৰ বিৰুদ্ধে ৰঙিয়া থানাত এজাহাৰ

এজন দায়িত্বশীল ব্যক্তি হৈয়ো কেৱল ৰাজনৈতিক স্বাৰ্থ সিদ্ধিৰ বাবেই ধাৰাবাহিকভাৱে আৰু হেলাৰঙে উৎকট সাম্প্ৰদায়িক মন্তব্য দি অহা বিজেপিৰ মন্ত্ৰী হিমন্ত বিশ্ব শৰ্মাৰ বিবৰুদ্ধে ৰঙিয়া থানাত দাখিল হৈছে এজাহাৰ। ২২ জানুৱাৰিত ৰঙিয়াৰ কনিহাৰ হৰেশ্বৰ বৰ্মন নামৰ লোকজনে মন্ত্ৰীজনৰ বিৰুদ্ধে দাখিল কৰিছে এজাহাৰখন।

এজাহাৰখনত তেওঁ হিমন্ত বিশ্ব শৰ্মাৰ বিৰূদ্ধে সাম্প্ৰদায়িক অশান্তি আৰু বিষবাষ্প বিয়পোৱাৰ অপচেষ্টা চলোৱাৰ অভিযোগ আনিছে।

২১ জানুৱাৰিত ৰঙিয়াৰ কলামণিত হিমন্ত বিশ্ব শৰ্মাক কৃষক মুক্তি সংগ্ৰাম সমিতি আৰু অসম জাতীয়তাবাদী যুৱ ছাত্ৰ পৰিষদৰ কেইজনমান সদস্যই ক’লা পতাকা দেখুৱাৰ পাছত হিমন্তই যি উৎকট সাম্প্ৰদায়িক মন্তব্য কৰিছিল তাৰ বাবেই এই এজাহাৰ দিয়া বুলি হৰেশ্বৰ বৰ্মনে জানিবলৈ দিয়ে।

নৰ্থ-ইষ্ট নাওক বৰ্মনে কয়, “হিমন্ত বিশ্ব শৰ্মাৰ দৰে এজন দায়িত্বশীল ব্যক্তিয়ে এনেধৰণৰ সাম্প্ৰদায়িক মন্তব্য কৰাটো কেতিয়াও গ্ৰহণযোগ্য নহয়। তেওঁ সাম্প্ৰদায়িক অশান্তি বিয়পোৱাৰ কু-অভিপ্ৰায়েৰেই সত্ৰলৈ গৈ থকা অৱস্থাত মুছলমানে কিয় ক’লা পতাকা দেখুৱাইছে বুলি মন্তব্য কৰিছে”।

আনহাতে ৰঙিয়া থানাত যোগাযোগ কৰাত ভাৰপ্ৰাপ্ত আৰক্ষী বিষয়াজনে এজাহাৰখন পোৱাৰ কথা স্বীকাৰ কৰিছে যদিও এতিয়াও গোচৰটো ৰুজু হোৱা নাই বুলি জানিবলৈ দিয়ে।

ইয়াৰ পূৰ্বেও মন্ত্ৰীজনৰ বিৰুদ্ধে কেইবাখনো এজাহাৰ দাখিল হৈছিল।

মন কৰিব লগীয়া কথাটো হ’ল আৰক্ষী বিভাগৰ শীৰ্ষস্থানীয় বিষয়ায়ো শক্তিশালী মন্ত্ৰীজনৰ বিৰুদ্ধে গোচৰ ৰুজু কৰিবলৈ অনিচ্ছুকতা প্ৰকাশ কৰা দেখা যায়।