অনিৰ্বাপিত জুই: ১৪ মাইলত অগ্নিয়ে গ্ৰাস কৰিলে কোটি কোটি টকাৰ সম্পত্তি
১৪ মাইলৰ শিৱা পলিমাৰএটা বস্তা কাৰখানাত লগা জুই এতিয়াও অনিৰ্বাপিত হৈয়েই আছে।
সোনাপুৰ আৰক্ষী থানাৰ অন্তৰ্গত ১৪ মাইল এলেকাত ৬ নং ৰাষ্ট্ৰীয় ঘাইপথৰ কাষত ঘটা অগ্নিকাণ্ডৰ ফলত শিৱা পলিমাৰ নামৰ এটা উদ্যোগ সম্পূৰ্ণৰূপে ভষ্মীভূত।
প্ৰাপ্ত তথ্য অনুসৰি, শুকুৰবাৰে নিশা প্ৰায় ৯:০০ বজাত ঘটনাস্থলীত উপস্থিত হোৱা অগ্নি নিৰ্বাপক বাহিনীৰ দলটোৱে নিৰন্তৰ জুই নিৰ্বাপিত কৰাৰ চেষ্টা কৰি আছে।
কিন্তু বৰ্তমানলৈকে জুই নিয়ন্ত্ৰণ কৰিব পৰা হোৱা নাই।
ঘটনাস্থলীত উপস্থিত হোৱা মেঘালয়ৰ নংপো, বাৰ্ণিহাট, অসমৰ সোনাপুৰ আৰু গুৱাহাটীৰ পৰা যোৱা অগ্নি নিৰ্বাপক বাহিনীৰ প্ৰায় ১০ খন গাড়ীয়ে নিৰন্তৰ ভাৱে জুই নুমুৱাবলৈ চেষ্টা কৰি আছে।
প্লাষ্টিকৰ বস্তা তৈয়াৰ কৰা কাৰখানাটোত শ্বৰ্ট চাৰ্কিটৰ ফলত জুইৰ সূত্ৰপাত ঘটাৰ সন্দেহ প্ৰকাশ কৰিছে আৰক্ষীয়ে।
অগ্নিকাণ্ডৰ ফলত কেইবা কোটি টকাৰ সম্পত্তি ধ্বংস হোৱাৰ সন্দেহ কৰা হৈছে।
এই ভয়ংকৰ অগ্নিকাণ্ডৰ ফলত, সমগ্ৰ অঞ্চলটোত বিদ্যুৎ যোগান বিচ্ছিন্ন হৈ পৰিছে।
একেদৰে ৬ নং ৰাষ্ট্ৰীয় ঘাইপথেৰে যান-বাহনৰ চলাচলতো ব্যাপক ব্যাঘাত জন্মিছে।