ৰাজ্যত খাৰুৱা তেলৰ ভাণ্ডাৰ শুকাইছে; প্ৰথমবাৰৰ বাবে এন আৰ এলে আমদানি কৰিলে খাৰুৱা তেল

নুমলীগড় শোধনাগাৰে ইয়াৰ ইতিহাসত প্ৰথমবাৰৰ বাবে বাহিৰৰ দেশৰ পৰা খাৰুৱা তেল আমদানি কৰে।

মালয়েছিয়াৰ পেট্ৰ’নাছৰ পৰা জাহাজেৰে পশ্চিম বংগৰ হালদীয়া বন্দৰলৈ আৰু তাৰ পৰা ৰে’লেৰে এই প্ৰথম খেপৰ আমদানিকৃত খাৰুৱা তেলখিনি অনা হৈছে। তেলৰ পৰিমাণ প্ৰায় ২,৭৬০ মেট্ৰিকটন।

নুমলীগড় শোধনাগাৰ কৰ্তৃপক্ষই জনোৱামতে, মালয়েছিয়াৰ এই মিৰি (Miri) খনিজ তেলত অসমৰ তেলৰ দৰেই ছালফাৰৰ পৰিমাণ কম, যাৰ বাবে ইয়াক মিঠা খনিজ তেল বুলিও কোৱা হয়।

শোধনাগাৰ কৰ্তৃপক্ষই এক বিজ্ঞপ্তিযোগে জানিবলৈ দিয়ামতে, ঘাইকৈ উজনি অসমৰ পৰা শোধনাগাৰটোৱে ইয়াৰ প্ৰয়োজনীয় খনিজ তেল সংগ্ৰহ কৰি আহিছিল যদিও অসমৰ লগতে সমগ্ৰ উত্তৰ-পূবত খনিজ তেলৰ ভাণ্ডাৰ শুকাই আহিছে।

ভৱিষ্যতে বাহিৰৰ তেলেৰে শোধনাগাৰটো চলিব লগীয়া হ’ব বুলি কৰ্তৃপক্ষই জনায়।

পৰ্য্যাপ্ত খাৰুৱা তেল নথকা বাবে বৰ্তমান শোধনাগাৰটোৰ শোধন ক্ষমতা 3 MMTPA সম্পূৰ্ণকৈ ব্যৱহৃত হোৱা নাই। আনহাতে ইয়াৰ শোধন ক্ষমতা অদূৰ ভৱিষ্যতে 9 MMTPA-লৈ বৃদ্ধি কৰাৰ পৰিকল্পনা হাতত লৈছে শোধনাগাৰ কৰ্তৃপক্ষই। এনে পৰিস্থিতিত খাৰুৱা তেলৰ চাহিদা বৃদ্ধি হ’ব।

উল্লেখযোগ্য যে অঞ্চলটোৰ পৰা খাৰুৱা তেল ৰপ্তানি কৰিবলৈ গুৱাহাটী-বাৰাউনী পাইপলাইনটো স্থাপন কৰা হৈছিল আৰু ৰপ্তানি কৰাও হৈছিল। কিন্তু বৰ্তমান খাৰুৱা তেলৰ ভাণ্ডাৰ হ্ৰাস পাই অহা বাবে ইয়াৰ ৰপ্তানি বন্ধ হৈছে আৰু একেই পাইপলাইনেৰে এতিয়া আমদানিহে কৰা হয়, বিজ্ঞপ্তিটোত এইদৰে কোৱা হৈছে।

মালয়েছিয়াৰ পৰা অহা প্ৰথমটো খেপৰ আমদানিকৃত খাৰুৱা তেলখিনিৰ কনছাইনমেণ্টটো হালদীয়া বন্দৰত শোধনাগাৰৰ পৰিচালন সঞ্চালক এছ কে বৰুৱাই আনুষ্ঠানিকভাৱে চমজি লয়।

উত্তৰ-পূৰ্বাঞ্চলত থকা চাৰিটা শোধনাগাৰৰ বৰ্তমান মুঠ শোধন ক্ষমতা 7 MMTPA।