মঙলদৈত খাদ্যত বিষক্ৰিয়া, ৮ জনক সংকটজনক অৱস্থাত চিকিৎসালয়ত ভৰ্তি

মঙলদৈৰ নিকতৱৰ্তী নগৰবাহী মোল্লাপাৰা গাঁৱত কালি অৰ্থাৎ দেওবাৰে খাদ্যত বিষক্ৰিয়া হৈ ৮ গৰাকী মহিলাসহ এটি শিশু গুৰুতৰভাৱে অসুস্থ হৈ পৰে।

ঘটনাৰ বিৱৰণি মতে গাওঁখনৰ নাজিমুদ্দিন হক নামৰ এজন লোকৰ ঘৰত আলহী খাবলৈ আহিছিল আক্ৰান্ত সকল। ইয়াৰ পিছতে নাজিমুদ্দিনৰ ঘৰত আটাইকেজনে চিৰা, দৈ, মিঠাই আদি খোৱাৰ পিছতেই অসুস্থ হৈ পৰে।

ফলত অসুস্থ হৈ পৰা মহিলাকেইগৰাকীক তাৎক্ষণিকভাৱে চিকিৎসালয়ত ভৰ্তি কৰোৱা হয়। খাদ্যত বিষক্ৰিয়া হৈ অসুস্থ হোৱাসকল হ’ল ক্ৰমে মফিদা বেগম (৫০), আৰিফা বেগম (৩২), চায়েৰা বেগম (৩০), ববিতা বেগম (২০), চায়েফা বেগম, মাকনি বেগম (৩০), পাৰবিন ইয়াচমিন (৭) আৰু জুলিমা বেগম (৩০)।

প্ৰাপ্ত তথ্য মতে চিৰা, দৈ খোৱাৰ প্ৰায় আধা ঘণ্টা মান পিছতে আটাইকেইজনৰে তেজ বমি, শৌচ হোৱাৰ লগতে শৰীৰ দুৰ্বল হৈ পৰে। ঘটনাৰ পিছতে পৰিয়াল আৰু স্থানীয় লোকে ততাতৈয়াকৈ মঙলদৈ অসামৰিক চিকিৎসালয়ত ভৰ্তি কৰায় যদিও চিকিৎসকে চিকিৎসাধীন আটাইকেইগৰাকীৰে অৱস্থা সংকটজনক বুলি জানিবলৈ দিয়ে।