বঢ়মপুৰত বন বিভাগৰ অতৰ্কিত অভিযানত ৫ লক্ষাধিক মূল্যৰ চোৰাং কাঠ জব্দ

নগাঁও জিলাৰ বিভিন্ন স্থানত অবৈধভাৱে চলি থকা চোৰাং কাঠৰ ৰমৰমীয়া বেহাক নাকী লগোৱাৰ উদ্দেশ্যে  বুধবাৰে বন বিভাগে জিলাখনৰ বিভিন্ন স্থানত চোৰাং কাঠ ব্যবসায়ীৰ বিৰুদ্ধে তীব্ৰ অভিযান চলায়।

বিভাগে প্ৰথমে নগাঁৱৰ পানীখাটী অঞ্চলত থকা কাঠ ফলা মিলসমূহত অভিযান চলাই আব্দুল মান্নান, মুকুট আলী আৰু নিপুল আহমেদৰ অবৈধ কাঠফলা মিল দুটা বন্ধ কৰি দিয়াৰ লগতে প্ৰায় ১ লাখ টকাৰ চোৰাং কাঠ জব্দ কৰে।

তাৰ পাছত অভিযানকাৰী দলটোৱে অভিযান চলাই চলচলি আৰু বঢ়মপুৰত। বন বিভাগৰ দলটোৱে বঢ়মপুৰৰ বৰটোপত অভিযান চলাই টুটুমনি শৰ্মাৰ অবৈধ কাঠমিলটো জব্দ কৰাৰ লগতে প্ৰায় ৩-৪ লাখ টকাৰ চোৰাং কাঠ জব্দ কৰে।

তাৰোপৰি, চলচলিত নজৰুল হুইছেনৰ পৰা প্ৰায় ৫০ ৰ পৰা ৬০ হাজাৰ টকা মূল্যৰ চোৰাং কাঠ জব্দ কৰে। বন বিভাগে উক্ত অভিযানত সৰ্বমুঠ তিনিটাকৈ কাঠ ফলা মিলৰ লগতে পাঁচ লক্ষাধিক মূল্যৰ চোৰাং কাঠ জব্দ কৰিবলৈ সক্ষম হয়।

অবশ্যে অভিযান কালত এজনো চোৰাং ব্যবসায়ীক আটক কৰিবলৈ সক্ষম নহল বন বিভাগৰ দলটোৱে। চোৰাং কাঠৰ ব্যৱসায়ীসকলৰ বিৰুদ্ধে বন বিভাগৰ এনে অতৰ্কিত অভিযানক সচেতন মহলে আদৰণি জনাইছে।