পুৰণিগুদাম আৰু চামগুৰিত বন্যহস্তীৰ ভীষণ উপদ্ৰৱ; ব্যৰ্থ বন বিভাগৰ হাতী খেদা অভিযান

পথাৰত ধান পকাৰ সময়ত বন্যহস্তীয়ে চলোৱা উপদ্ৰৱ এক স্বাভাৱিক কথা! কিন্তু নগাঁও জিলা চামগুৰি আৰু পুৰণিগুদামৰ বৃহত্তৰ অঞ্চলত এই বছৰ ধান পকাৰ বহু পূৰ্বৰে পৰা বন্যহস্তীৰ জাকে চলাই অহা চূড়ান্ত উপদ্ৰৱে ত্ৰাহি মধুসূদন সোঁৱৰাইছে অঞ্চলবাসীক।

তিনি-চাৰি জনীয়া বনৰীয়া হাতীৰ জাকে বিভিন্ন সময়ত পুৰণিগুদামৰ নিকটৱৰ্ত্তী ভৰাগুৰি, পদুমণি, দিলকাবস্তি, বৰদল, চামগুৰিৰ গেন্ধালি, কুৰুৱাবাহী আদি অঞ্চলত উপদ্ৰৱৰ সৃষ্টি কৰি তহিলং কৰিছে বহু কৃষকৰ খেতি-পথাৰ।

লগতে বৃহত্তৰ অঞ্চলটোৰ বহু লোকৰ বাসগৃহ, ভৰাঁল, দোকান, ফাৰ্ম আদি ভাঙি লণ্ডভণ্ড কৰি বিস্তৰ ক্ষতি সাধন কৰিছে।

শেহতীয়াকৈ ভৰাগুৰিত তিনি জনীয়া এটা বনৰীয়া হাতীৰ দলে প্ৰায় এসপ্তাহ ধৰি চলাই অহা উপদ্ৰৱৰ অন্তত শালনা আঞ্চলিক বন বিষয়াৰ কাৰ্যালয়ৰ একাংশ বন বিষয়া আৰু বনকৰ্মীয়ে উদমাৰি উপ খণ্ড বন বিষয়াৰ কাৰ্যালয়ৰ বনকৰ্মী সকলৰ সহযোগত ভৰাগুৰিত হাতী খেদোৱাৰ ব্যাপক অভিযান আৰম্ভ কৰে।

প্ৰায় ২০-২৫ জনীয়া বন বিভাগৰ অভিযানকাৰী দলটোৱে গুলি আৰু ফটকা ফুটাই ভৰাগুৰিৰ পাগলী বাৰিৰ পৰা কাৰ্বি পাহাৰৰ দিশে বনৰীয়া হাতীৰ দলটো খেদি পঠিওৱাৰ চেষ্টা চলায়।

কিন্তু নিশা হোৱাৰ লগে-লগে অঞ্চলটোৰ পৰা কিছু দূৰৈৰ এখন ডাঠ হাবিত হাতী কেইটাই অৱস্থান গ্ৰহণ কৰাত বন বিভাগৰ হাতী খেদোৱা অভিযানত চেঁচা পানী পৰে।

অৱশ্যে, ওৰে নিশা বন বিভাগৰ লোকে বৃহত্তৰ অঞ্চলটোত পহৰাৰ ব্যৱস্থা কৰি বনৰীয়া হাতী কেইটাৰ উপদ্ৰৱৰ পৰা নিতৌ বিনিদ্ৰ ৰজনী কটাই অহা অঞ্চলবাসীক কিছু পৰিমাণে সকাহ প্ৰদান কৰা দেখা যায়।