বন ধ্বংসকাৰী, বেদখলকাৰীৰ বিৰুদ্ধে ৰংজুলি বন বিভাগৰ ধাৰাবাহিক অভিযান

বন ধ্বংসকাৰী তথা বেদখলকাৰীৰ বিৰুদ্ধে গোৱালপাৰা জিলাৰ ৰংজুলি বন বিভাগে যোৱা তিনিমাহত ধাৰাবাহিক অভিযান চলাই বৃহৎ সফলতা অৰ্জন কৰিছে।

বিভিন্ন সময়ত অভিযোগ উত্থাপন হৈ আহিছে যে, বন মাফিয়া, চোৰাং কাঠ ব্যৱসায়ীৰ জেপত থাকে একাংশ বন বিষয়াৰ লগতে বনকৰ্মী।

কিন্তু এই অভিযোগৰ বিপৰীতে মাত্ৰ তিনিটা মাহতে ৰংজুলি বনাঞ্চলিক বিষয়া চেলিম আহমেদৰ নেতৃত্বত ৰংজুলি এলেকাৰ বিভিন্ন ঠাইৰ পৰা ৭ লক্ষাধিক টকা মূল্যৰ চোৰাং কাঠ, ৭ টাকৈ অবৈধ কাঠফ’লা মিল, চোৰাং কাঠ কঢ়িওৱা ১৩ খন বাহন জব্দ কৰাৰ লগতে ১৫ হেক্টৰ বনাঞ্চলৰ মাটি বেদখল মুক্ত কৰে ৰংজুলি বন বিভাগে ৷

এক সংবাদমেল যোগে এই দাবী কৰিছে বনাঞ্চলিক বিষয়া গৰাকীয়ে ৷

কোনো কাৰণতে চোৰাং কাঠৰ বেহা বা বেদখলকাৰীক ৰেহাই দিয়া নহ’ব বুলিও তেওঁ হুংকাৰ প্ৰদান কৰে ৷

আনহাতে, সমগ্ৰ গোৱালপাৰা জিলাখনৰ লগতে ৰংজুলি এলেকাৰ বিভিন্ন ঠাইত হাতী-মানুহৰ সংঘাত কোনো নতুন কথা নহয়, সন্ধিয়া হ’লেই বন্যহস্তী জনাঞ্চলত প্ৰৱেশ কৰি আৰম্ভ কৰে তাণ্ডৱ।

গতিকে এই হাতী-মানুহৰ সংঘাতৰ স্থায়ী সমাধান কৰাৰ ক্ষেত্ৰত চৰকাৰ আৰু বন বিভাগে চিন্তাচৰ্চা কৰি থকা বুলি জানিবলৈ দি অতি সোনকালে সেইকথা সকলোৱে জানিব পাৰিব বুলিও যথেষ্ট গুৰুত্বপূৰ্ণ মন্তব্য কৰে।