মোদীৰ জনপ্ৰিয়তা এতিয়া নাই, গতিকে ৰাজনীতি বাজপেয়ীৰ অস্থিক লৈয়ে কৰিছে বিজেপিয়ে : তৰুণ গগৈ

“অতলবিহাৰী বাজপেয়ীৰ গুণানুকীৰ্তন পূৰ্বতে মোদীৰ মুখৰ পৰা শুনা নাছিলো। জীৱিত কালত বাজপেয়ীক অলপো গুৰুত্ব দিয়া নাছিল। এতিয়া বাজপেয়ীৰ অস্থিক লৈ ৰাজনীতি কৰিছে বিজেপিয়ে।”

এই মন্তব্য প্ৰাক্তন মুখ্য মন্ত্ৰী তৰুণ গগৈৰ। আজি নিজৰ বাসভৱনতে আয়োজন কৰা এখন সংবাদমেল সম্বোধন কৰি প্ৰাক্তন মুখ্য মন্ত্ৰীজন বিজেপি আৰু মোদীৰ শাসনৰ বিৰুদ্ধে সৰৱ হৈ পৰে।

তৰুণ গগৈয়ে মোদীৰ প্ৰতিশ্ৰুতিবোৰ মনত পেলাই দি কয়, “১৫ লাখকৈ টকা প্ৰতিজন নাগৰিকৰ বেংক একাউণ্টত সোমাব, প্ৰতি বছৰে ২ কোটি চাকৰি সৃষ্টি, সবকা সাথ সবকা বিকাশ এই সকলোবোৰ মিছা।”

ইফালে বাজপেয়ীক নিজে শ্ৰদ্ধা কৰিছিল বুলি কৈ কয়, “বাজপেয়ীৰ মাইনাছ পইন্ট তেওঁ নিযুক্তি বন্ধ কৰি ৰাখিছিল। তথাপি তেওঁক শ্ৰদ্ধা কৰো।”

আনহাতে, বিতৰ্কিত ৰাফেল বিমান ক্ৰয় সন্দৰ্ভত মোদী চৰকাৰে দেশবাসীক আঁৰত ৰখা বাবেও সমালোচনা কৰে। “পূৰ্বৰ তুলনাত ৰাফেল বিমানৰ মূল্য তিনিগুণ বাঢ়িল। ৰাফেল বিমান ক্ৰয়ৰ চুক্তিপত্ৰখনত প্ৰধান মন্ত্ৰীয়ে নিজেই চহী কৰিছে। এনেধৰণৰ ডীলত প্ৰধান মন্ত্ৰীয়ে চহী কৰাৰ নজিৰ নাই। মোদীয়ে প্ৰথম। ফ্ৰান্সত গ’লেও আম্বানিক লগত লৈ যায়।” এইদৰে কয় গগৈয়ে।

মোদীৰ নেতৃত্বত বিজেপিৰ দুৰ্নীতিতো প্ৰশ্ন উঠায় প্ৰাক্তন মুখ্য মন্ত্ৰীজনে। ‘আটাইতকৈ ব্যয়বহুল দলীয় কাৰ্যালয় বিজেপিৰে আছে। দলে টকা ক’ৰ পৰা পায় যদি দুৰ্নীতি নকৰে?’ এই বুলি কয় গগৈয়ে।

বিমুদ্ৰাকৰণ, জি এছ টিৰ জৰিয়তে মোদীয়ে সৰু সৰু ব্যৱসায়ী, ঠিকাদাৰক মাধমাৰ মাৰিলে বুলি অভিযোগ কৰে গগৈয়ে।

বিদেশী সন্দৰ্ভত বিজেপিৰ স্থিতিক আক্ৰমণ কৰি কয়, “বিদেশী খেদিব বিচাৰিছে নে ৰাখিব বিচাৰিছে? ৱৰ্ক পাৰ্মিট দিলে বিদেশীসকলক একেবাৰে ভাৰততে স্থায়ীভাৱে থাকিব দিব লাগে।”

সংবাদমেলখনত অংগনৱাড়ী কেন্দ্ৰবোৰত হোৱা কেলেংকাৰিৰ তদন্ত কৰিবলৈ চৰকাৰক আহ্বান জনায় গগৈয়ে। “অংগনৱাড়ী কেন্দ্ৰসমূহত হোৱা কেলেংকাৰিৰ তদন্ত কৰিব লাগে। মেনকা গান্ধীয়ে নিজেই কেলেংকাৰি থকাৰ কথা স্বীকাৰ কৰিলে। মেনকাই অভিযোগ আনিছে যেতিয়া চি বি আই তদন্ত হ’ব লাগে। মোৰ দিনতো যদি কেলেংকাৰি হৈছিল তেন্তে কৰক তদন্ত। মোৰ কোনো আপত্তি নাই।” এইদৰে কয় গগৈয়ে।