য়াছিন মালিকৰ সৈতে সম্পৰ্কিত গোচৰত জম্মু-কাশ্মীৰৰ প্ৰাক্তন মুখ্যমন্ত্ৰীৰ জীয়ৰীলৈ চিবিআইৰ চমন

সন্ত্ৰাসবাদীক অৰ্থৰ যোগান ধৰাৰ অভিযোগত অভিযুক্ত জম্মু-কাশ্মীৰৰ বিচ্ছিন্নতাবাদী নেতা য়াছিন মালিকক যোৱা বুধবাৰে নিয়াৰ আদালতে আজীৱন কাৰাদণ্ডৰ শাস্তিৰে দণ্ডিত কৰে। নিষিদ্ধ ঘোষিত সংগঠন জম্মু-কাশ্মীৰ লিবাৰেচন ফ্ৰণ্ট (জেকেএলএফ) ৰ মুৰব্বী য়াছিন মালিক সম্প্ৰতি আন একাধিক অভিযোগত অভিযুক্ত হৈ আছে।

য়াছিন মালিকৰ বিৰুদ্ধে উত্থাপিত এনে এক অভিযোগৰ সৈতে এইবাৰ নাম সাঙোৰ খাইছে জম্মু-কাশ্মীৰৰ প্ৰাক্তন মুখ্যমন্ত্ৰী মুফতি মহম্মদ চৈয়দৰ কন্যা ৰুবাইয়া চৈয়দৰ। ১৯৮৯ চনৰ এক গোচৰ সংক্ৰান্তত ৰুবাইয়ালৈ আজি চমন জাৰি কৰিছে চিবিআই- এ। অৱশ্যে এই গোচৰৰ অভিযুক্ত হিচাপে নহয়, সাক্ষী হিচাপেহে ৰুবাইয়াৰ নাম জড়িত হৈ পৰিছে গোচৰটোত।

জম্মু-কাশ্মীৰ লিবাৰেচন ফ্ৰণ্টে ১৯৮৯ চনৰ ৮ ডিচেম্বৰত ৰুবাইয়া চৈয়দক অপহৰণ কৰিছিল। সংগঠনটোৱে ৰুবাইয়াৰ মুক্তিপণ হিচাপে তেওঁলোকৰ পাঁচজন বন্দীৰ মুক্তি দাবী কৰিছিল।

সেই সময়ৰ বিজেপি সমৰ্থিত ভি পি সিং চৰকাৰে জম্মু-কাশ্মীৰ লিবাৰেচন ফ্ৰণ্টৰ দাবী মানি পাঁচজন সন্ত্ৰাসবাদী সদস্যক মুকলি কৰি দিয়ে। সন্ত্ৰাসবাদী সদস্যকেইজনৰ মুক্তিৰ পাঁচ দিন পিছত ৰুবাইয়াকো বন্দীত্বৰ পৰা মুকলি কৰি দিয়ে জেকেএলএফে।

এই অপহৰণৰ গোচৰটোৰ সাক্ষী হিচাপে তদন্তকাৰী সংস্থা চিবিআই- এ ৰুবাইয়া চৈয়দক ১৫ জুলাইৰ ভিতৰত আদালতত হাজিৰ হ’বলৈ চমন জাৰি কৰিছে। উল্লেখ্য যে জেকেএলএফৰ মুৰব্বী য়াছিন মালিক এই গোচৰটোৰ অন্যতম অভিযুক্ত।

ৰুবাইয়া অপহৰণ গোচৰত মালিককে ধৰি ১০ জন লোকৰ বিৰুদ্ধে যোৱা বৰ্ষৰ জানুৱাৰীত চিবিআইয়ে অভিযোগ দাখিল কৰিছিল। চিবিআইৰ তদন্তৰ সময়ত এই দহগৰাকী অভিযুক্তই স্বেচ্ছাই দণ্ডাধীশৰ সন্মুখত দোষ স্বীকাৰ কৰাৰ লগতে ৰুবাইয়াৰ অপহৰণ কাণ্ডত য়াছিন মালিকৰ লগতে আন কেইবাজনো অভিযুক্ত জড়িত থকাৰ কথা নিশ্চিত কৰে।

ইয়াৰ পিছতে চিবিআইয়ে আদালতত দাখিল কৰা অভিযোগপত্ৰত এই ১০ গৰাকী সদস্যসহ মুঠ ২৪ গৰাকী অভিযুক্তৰ নাম সন্নিবিষ্ট কৰিছিল। অৱশ্যে গোচৰটোৰ দুই প্ৰধান অভিযুক্ত জেকেএলএফৰ শীৰ্ষ কমাণ্ডাৰ মহম্মদ ৰফিক দাৰ আৰু মুস্তাক আহমেদ লৌনৰ ইতিমধ্যে মৃত্যু হৈছে। আনহাতে আন ১২ জন অভিযুক্ত বৰ্তমান পলাতক অৱস্থাত আছে।

উক্ত গোচৰত সাক্ষ্যদান কৰা ১০ গৰাকী অভিযুক্তৰ সাক্ষ্যক পলাতক অভিযুক্ত সকলৰ বিৰুদ্ধে প্ৰমাণ হিচাপে ব্যৱহাৰ কৰিব পৰা হ’ব বুলি যোৱা বৰ্ষৰ জানুৱাৰীত আদালতে ঘোষণা কৰিছিল।