প্ৰাক্তন কেন্দ্ৰীয় মন্ত্ৰী, ৰাজপৰিয়ালৰ সন্তান, ৰে’লৰ বাবে অপেক্ষা ষ্টেচনত! মন জয় কৰিলে গজপতিয়ে
হায়দৰাবাদ ষ্টেচনত পৰিয়ালৰ সৈতে ৰে’লৰ বাবে অপেক্ষা কৰি আছে এজন বয়স্ক ব্যক্তি। দেখাত এই ছবিখনত কোনো অস্বাভাৱিক কথা নাই। স্বাভাৱিকভাৱে বিস্মিত হোৱাৰ বিষয়ো নহয়। কিন্তু অপেক্ষাৰত ব্যক্তিজন যদি এজন প্ৰাক্তন কেন্দ্ৰীয় মন্ত্ৰী হয় আৰু যদি তেওঁ কোনো বিখ্যাত ৰাজপৰিয়ালৰ সদস্য হয়, তেন্তে মনত কিছু প্ৰশ্নই দোলনি দি যোৱাটো অৱশ্যেই স্বাভাৱিক।
ষ্টেচনত অপেক্ষা কৰি থকা এই বয়স্ক যাত্ৰীজনৰ নাম অশোক গজপতি ৰাজু। মোডী চৰকাৰৰ প্ৰথমটো কাৰ্যকালত (২০১৪-২০১৮) বিজয়নগৰম ৰাজপৰিয়ালৰ এই সন্তানে অসামৰিক বিমান পৰিবহণ মন্ত্ৰালয়ৰ দায়িত্ব চম্ভালিছিল।
এটা সময় আছিল যেতিয়া ৰাজনীতিৰ ক্ষেত্ৰখনত ইমান টকা অহা নাছিল। ৰাজনীতিবিদসকলকো আন পাঁচজন সাধাৰণ মানুহৰ দৰে দেখা গৈছিল। ব্যতিক্ৰম তেতিয়া যেনেদৰে আছিল, এতিয়াও আছে। কিন্তু পাৰ্থক্যটো হ’ল, সেই সময়ত সেই নেতাসকল ব্যতিক্ৰমী আছিল, যিসকলে পাঁচজন সাধাৰণ মানুহৰ লগত মিলি গ’লেও নিজৰ পদৰ গৌৰৱ এৰিব পৰা নাছিল। দেখাত সমান হ’লেও পদৰ মৰ্যাদা সদায় জিলিকাই ৰাখিছিল আৰু বুজাই দিয়ে, তেওঁ বেলেগ!
লগতে পঢ়কঃ ‘মেই অটল হু’ ছবি মুক্তিৰ পিছতে অভিনয় এৰিব পংকজ ত্ৰিপাঠীয়ে? কিয় ল’লে এই সিদ্ধান্ত?
আৰু এতিয়া তাৰ সম্পূৰ্ণ ওলোটা হৈছে। শেহতীয়াকৈ নেতা, মন্ত্ৰী মানে সাধাৰণ মানুহতকৈ বেলেগ কিবা এটা। আৰু যাক সাধাৰণ মানুহৰ পৰা পৃথক কৰিব নোৱাৰি, তেওঁৱেই আজি ব্যতিক্ৰম। যেনে তেলেগু দেশম পাৰ্টিৰ জ্যেষ্ঠ নেতা অশোক গজপতি ৰাজু।
২০১৪ চনত যেতিয়া মোডী চৰকাৰ ক্ষমতালৈ আহিছিল, তেতিয়া সেই কাৰ্যকালৰ বেছিভাগ সময় তেওঁ অসামৰিক বিমান পৰিবহণ মন্ত্ৰী আছিল। তেওঁৰ আন এক পৰিচয় আছে। বিখ্যাত বিজয়নগৰম ৰাজপৰিয়ালৰ সদস্য। প্ৰথমে প্ৰাক্তন কেন্দ্ৰীয় মন্ত্ৰী, দ্বিতীয়তে ৰাজপৰিয়ালৰ সন্তান, কোনেইবা বুজিব পাৰিছিল যে এই অশোক ব্যতিক্ৰম হ’ব।
Ashok Gajapathi Raju, a king in his own right, waiting for a train to go back home like a commoner at the Hyderabad Railway station. He is an epitome of honesty and integrity, always doing what is best for people. Power never corrupts him.
This is Telugu Desam for you! pic.twitter.com/age1Ml8YO3— Telugu Desam Party (@JaiTDP) January 10, 2024
কিছু ছবি ছচিয়েল মিডিয়াত বিয়পি পৰিছে। য’ত দেখা গৈছে, হায়দৰাবাদ ষ্টেচনত ৰে’লৰ বাবে অপেক্ষা কৰি পৰিয়ালৰ সদস্যৰ সৈতে বহি আছে প্ৰাক্তন কেন্দ্ৰীয় মন্ত্ৰীগৰাকী। প্ৰতিটো ষ্টেচনৰ খুঁটাবোৰৰ চাৰিওফালে যি চিমেণ্টৰ বেদী থাকে তাত তেওঁক বহি থকা দেখা গৈছে নীলা ৰঙৰ জেকেট পিন্ধি। কাষতে সৰু ল’ৰা এটা। সম্ভৱতঃ গজপতিৰ নাতি। আন এগৰাকী বৃদ্ধাকো দেখা গৈছে। তেওঁ চাগে গজপতিৰ পত্নী।
তেওঁলোকৰ প্ৰত্যেককে অতি স্বাভাৱিকভাৱে ষ্টেচনত ৰে’লখনৰ বাবে অপেক্ষা কৰি থকা দেখা যায়। এনে পৰিপ্ৰেক্ষিতত ছ’চিয়েল মিডিয়াত বহু লোকে বৰ্তমানৰ অসামৰিক বিমান পৰিবহণ মন্ত্ৰীগৰাকীৰ কথা সোঁৱৰাই দিছে। তেওঁ হৈছে জ্যোতিৰাদিত্য সিন্ধিয়া। ৰাজনীতিৰ ক্ষেত্রত ‘মহাৰাজা’ নামেৰে সৰ্বাধিক পৰিচিত। শুনা যায় যে তেওঁৰ আচৰণো হেনো সেই নামৰ লগত খাপ খাই পৰা।