Rahul Gandhi ‘নেচনেল হেৰাল্ড’ গোচৰ: ৰাহুল গান্ধীলৈ পুনৰ জাননী এনফোৰ্চমেণ্ট সঞ্চালকালয়ৰ, ১৩ জুনত হাজিৰ হোৱাৰ নিৰ্দেশ

New Delhi: এনফোৰ্চমেণ্ট সঞ্চালকালয়ে (ইডি) ‘নেচনেল হেৰাল্ড’ গোচৰ সন্দৰ্ভত কংগ্ৰেছ দলৰ পৰা নিৰ্বাচিত সাংসদ ৰাহুল ১৩ জুনত সংস্থাটোৰ সন্মুখত হাজিৰ হ’বলৈ নতুনকৈ চমন জাৰি কৰিছে।

উল্লেখ্য ইডিয়ে ছোনিয়া গান্ধীক ৮ জুনত ইডিৰ সন্মুখত হাজিৰ হ’বলৈ কৈছিল। কিন্তু ছোনিয়া গান্ধী কোভিডত আক্ৰান্ত হোৱা বাবে তেওঁ ইডিৰ সন্মুখত উক্ত দিনা হাজিৰ হ’ব পাৰিবনে নাই সেই কথাত সন্দেহ আছে।

ৰাহুল গান্ধীয়ে বৰ্তমান লণ্ডন ভ্ৰমণ কৰি আছে। সেয়ে তেওঁ ২ জুমত ইডিৰ সন্মুখত হাজিৰ হ’ব নোৱাৰিলে।

ছোনিয়া গান্ধী আৰু ৰাহুল গান্ধীলৈ চমন জাৰিৰ পূৰ্বে ইডিয়ে কংগ্ৰেছ নেতা মল্লিকাৰ্জুন খাৰ্গে আৰু পৱন বনচালক জেৰা কৰিছিল।

“ৰাহুল গান্ধীক আগতে ২ জুনত হাজিৰ হ’বলৈ কোৱা হৈছিল, কিন্তু তেওঁ দেশৰ বাহিৰত থকাৰ বাবে নতুন তাৰিখ বিচাৰিছিল,” ইডিৰ এজন বিষয়াই কয়।

গান্ধী পৰিয়ালৰ সদস্যৰ লগতে আন বহুতৰে নাম জৰিত হৈ থকা ‘নেচনেল হেৰাল্ড’ গোচৰত ছোনিয়া গান্ধী আৰু ৰাহুল গান্ধীলৈ চমন জাৰি কৰাৰ বিষয়টোৱে পুনৰ চাঞ্চল্যৰ সৃষ্টি কৰিছে। এই কথাই এতিয়া কংগ্ৰেছৰ অন্দৰ মহলত তীব্ৰ জোকাৰণিৰ সৃষ্টি কৰিছে।

২০১১-১২ চনৰ ‘নেচনেল হেৰাল্ড’ গোচৰৰ সতে সম্পৰ্কীত ধনৰ অবৈধ লেনদেনৰ এটা গোচৰত এই চমন জাৰি কৰা হৈছে। এই গোচৰৰ তদন্তকাৰী বিষয়াৰ সন্মুখত ৮ জুনত ছোনিয়া গান্ধীক হাজিৰ হ’বলৈ নিৰ্দেশ দিয়া হৈছিল । আনহাতে ৰাহুলক ২ জুনৰ দিনা ইডিৰ সন্মুখত হাজিৰ হ’বলৈ নিৰ্দেশ দিয়া হৈছিল।

উল্লেখ্য নেচনেল হেৰাল্ড গোচৰত অভিযুক্ত কংগ্ৰেছ সভানেত্ৰী ছোনিয়া গান্ধী আৰু তেওঁৰ পিত্ৰ ৰাহুল গান্ধীসহ অন্য অভিযুক্তৰ পৰা সহযোগিতা কামনা কৰিছিল দিল্লী উচ্চ ন্যায়ালয়ে।দিল্লী উচ্চ ন্যায়ালয়ে বিজেপিৰ সাংসদ সুব্ৰমণিয়াম স্বামীয়ে দাখিল কৰা এক আবেদনৰ বিচাৰ প্ৰক্ৰিয়াত ছোনীয়া গান্ধী আৰু পুত্ৰ ৰাহুল গান্ধীসহ অন্য অভিযুক্তসকলৰ সহযোগিতাৰ কামনা কৰিছিল।

দিল্লী উচ্চ ন্যায়ালয়ৰ ন্যায়াধীশ সুৰেশ কাইটে এখন জাননী যোগে বিজেপি সাংসদ সুব্ৰমণিয়াম স্বামীৰ আবেদনৰ সন্দৰ্ভত গান্ধী পৰিবাৰ লগতে কংগ্ৰেছৰ সাধাৰণ সম্পাদক অস্কাৰ ফাৰ্ণাণ্ডেজ, চুমন ডুবে, শাম পিট্ৰ’ডা আৰু য়ঙ ইণ্ডিয়াৰ স্থিতি কি জানিব বিচাৰিছিল।

উল্লেখ্য যে গান্ধী পৰিয়ালৰ লগতে অন্যান্য অভিযুক্তসকলে ইয়ং ইণ্ডিয়ান প্ৰাইভেট লিমিটেড(ৱাইআই) আৰু নেশ্যনেল হেৰাল্ডৰ মালিক পক্ষ এচ’ছিয়েট জাৰ্ণেলছ প্ৰাইভেট লিমিটেডৰ পুঁজি অপব্যৱহাৰত জড়িত থকাৰ অভিযোগ উত্থাপন কৰি আহিছে সুব্ৰমণিয়াম স্বামীয়ে।