নাবালক সন্তানৰ তথ্য ৰাজহুৱা কৰাৰ বিৰুদ্ধে আইনী ব্যৱস্থাৰ হুংকাৰ গৌৰৱ গগৈৰ

প্ৰদেশ কংগ্ৰেছৰ সভাপতি গৌৰৱ গগৈয়ে সোমবাৰে মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে তীব্ৰ ক্ষোভ উজাৰি আইনী ব্যৱস্থা গ্ৰহণৰ হুংকাৰ দিয়ে। ৯ আৰু ৫ বছৰীয়া দুই নাবালক সন্তানৰ ব্যক্তিগত তথ্য ৰাজহুৱা কৰাৰ অভিযোগ তুলি গগৈয়ে মুখ্যমন্ত্ৰীৰ বিৰুদ্ধে ‘নাবালক ন্যায় (শিশুৰ যত্ন আৰু সুৰক্ষা) আইন, ২০১৫’ৰ অধীনত আদালতৰ কাষ চপাৰ কথা ঘোষণা কৰে।

উল্লেখ্য যে, যোৱা দেওবাৰে মুখ্যমন্ত্ৰীয়ে অভিযোগ কৰিছিল যে গৌৰৱ গগৈয়ে তেওঁৰ পুত্ৰক ব্ৰিটিছ নাগৰিকত্ব প্ৰদানৰ বাবে ভাৰতীয় পাছপোৰ্ট সমৰ্পণ কৰিছিল। শৰ্মাই দাবী কৰিছিল যে ভাৰতীয় পাছপোৰ্টত পুত্ৰৰ ধৰ্ম ‘হিন্দু’ বুলি উল্লেখ আছিল যদিও ব্ৰিটিছ পাছপোৰ্টত ধৰ্মৰ স্তম্ভটো খালী ৰখা হৈছে। লগতে তেওঁ গৌৰৱ গগৈৰ কন্যাৰ ধৰ্ম জন্মৰে পৰা ‘খ্ৰীষ্টান’ বুলি উল্লেখ থকা বুলিও মন্তব্য কৰিছিল। ইয়াৰ বিৰুদ্ধে প্ৰতিক্ৰিয়া প্ৰকাশ কৰি গগৈয়ে কয় যে উক্ত আইনৰ ৭৪ নম্বৰ ধাৰাই কোনো নাবালকৰ পৰিচয় মাধ্যম বা ৰাজহুৱা নথিত প্ৰকাশ কৰাত কঠোৰ নিষেধাজ্ঞা আৰোপ কৰিছে।

২০১৩ চনৰ পাকিস্তান ভ্ৰমণক লৈ মুখ্যমন্ত্ৰীয়ে উত্থাপন কৰা অভিযোগৰ সন্দৰ্ভত গৌৰৱ গগৈয়ে কয়, “মই আন দেশৰ এজেণ্ট বুলি মুখ্যমন্ত্ৰীয়ে যি অভিযোগ তুলিছিল, তাৰ কোনো প্ৰমাণ তেওঁ দিব নোৱাৰিলে। এছ.আই.টি প্ৰতিবেদনত যে কোনো সাৰাংশ নাই, সেই কথা তেওঁ এতিয়া উপলব্ধি কৰিছে।” গগৈয়ে স্পষ্ট কৰে যে তেওঁ আদালতৰ পৰা তদন্তৰ ওপৰত কোনো স্থগিতাদেশ বিচৰা নাছিল, কাৰণ তেনে কৰিলে বিজেপিয়ে তেওঁ তদন্তৰ পৰা পলোৱা বুলি অপপ্ৰচাৰ কৰিবলৈ সুযোগ পালেহেঁতেন।

নিজৰ পাকিস্তান ভ্ৰমণৰ উদ্দেশ্য ব্যাখ্যা কৰি গগৈয়ে কয় যে সেই সময়ত তেওঁ ন-বিবাহিত আছিল আৰু তেওঁৰ পত্নীয়ে পাকিস্তানত এটা আন্তঃৰাষ্ট্ৰীয় জলবায়ু কাৰ্যসূচীত কাম কৰি আছিল। পত্নীক সাক্ষাৎ কৰাৰ লগতে সিন্ধু সভ্যতাৰ ঐতিহাসিক স্থান তক্ষশীলা দৰ্শনৰ বাবেহে তেওঁ ইছলামবাদলৈ গৈছিল। ইয়াৰ পাছতে মুখ্যমন্ত্ৰীয়ে ‘এক্স’যোগে প্ৰত্যুত্তৰ দি লিখে, “তক্ষশীলা ইছলামবাদত নহয়, ৰাৱালপিণ্ডি জিলাতহে অৱস্থিত। যদি তেওঁৰ ভিছাত কেৱল লাহোৰ, কৰাচী আৰু ইছলামবাদ ভ্ৰমণৰহে অনুমতি আছিল, তেন্তে তেওঁ তক্ষশীলালৈ কেনেকৈ গ’ল?”

পত্নীৰ বিৰুদ্ধে অনা অভিযোগ খণ্ডন গৌৰৱ গগৈৰ পত্নীয়ে পাকিস্তানৰ নাগৰিক আলী তৌকিৰ শ্বেখক আই.বি (IB) ৰ প্ৰতিবেদন দিয়া বুলি উঠা অভিযোগো তেওঁ নসাৎ কৰে। গগৈয়ে স্পষ্ট কৰে যে জলবায়ু কাৰ্যসূচীৰ অংশ হিচাপে কিছুমান তথ্য জমা দিবলগীয়া হয় আৰু তেওঁৰ পত্নীয়ে কেৱল সংবাদ মাধ্যমত প্ৰকাশিত তথ্যহে ব্যৱহাৰ কৰিছিল। লগতে পাকিস্তানত থকা বেংক একাউণ্টটো দৈনন্দিন খৰচৰ বাবেহে ব্যৱহাৰ কৰা হৈছিল আৰু ভাৰতলৈ অহাৰ পাছত সেয়া বন্ধ কৰি দিয়া হৈছে বুলি তেওঁ জানিবলৈ দিয়ে।